Публикации » Вырăнтах пулăшу памалла

Майăн 20-мĕшĕнче районта, республикăри пекех, Информаци кунĕ иртрĕ. Ку хутĕнче пирĕн района ЧР сывлăх сыхлавĕн министрĕ Н.Суслонова ертсе пыракан ушкăн килчĕ.

Шупашкартан килсе çитнĕ тĕрлĕ министерствăсемпе ведомствăсен представителĕсем ушкăнсем çине пайланса ял тăрăхĕсене çитрĕç, вырăнти ĕç коллективĕсемпе тĕл пулса вĕсене канăçсăрлантаракан ыйтусемпе интересленчĕç, хурав пачĕç.

Район пуçлăхĕ А.Криков ертсе пыракан ушкăн Атнар ял тăрăхĕнче пулчĕ. Чи малтанах ушкăн Атнарти врач офисĕн ĕçĕ-хĕлĕпе интересленчĕ. Сывлăх сыхлавĕн министрĕ педиатрсен ача амăшĕсене вырăнтах, район центрне тухмасăр, пулăшу памалла терĕ. Çавăн пекех врач офисĕнче эмел илмелли рецепта çырса панисĕр пуçне медикаментсене кунтах сутма майсем тумалли çинчен каларĕ. Унтан район пуçлăхĕпе А.И.Криковпа Н.В.Суслонова Ваттисен çуртĕнче пулчĕç, кунта пурăнакансен пурнăçĕпе интересленчĕç.

Малалли кун йĕркинче вĕсем Атнар ял тăрăхĕнчи çынсемпе, унтан тĕп больницăн ĕç коллективĕпе тĕл пулчĕç. Ушкăн ертÿçисем пухăннисене влаçăн тата вырăнти хăй тытăмлăх органĕсен ЧР Президенчĕн «2010-2012 çулсенче Чăваш Республикин бюджет политикинчи тĕп çул-йĕрсем çинчен» Указне пурнăçлас задачисем çинчен; республикăн «Чăваш Республикинче 2009-2011 çулсенче пирус туртассинчен сыхланмалли ĕçсем» тĕллевлĕ программăна пурнăçа кĕртес мерăсем çинчен; вырăнти хăй тытăмлăх органĕсен ялсене, вăрмансене тата экономика объекчĕсене пушар пуласран сыхлассине тивĕçтерес, çавăн пекех муниципаллă пĕрлешÿсен территорийĕсене, масарсене, ял тăрăхĕсенчи çулсене тирпейлес задачисем пирки калаçрĕç.

Кăнтăр иртсен пур ушкăн ертÿçи те райадминистрацинче пĕтĕмлетÿ тунă, ял çыннисем хускатнă ыйтусене тишкернĕ.