Публикации » Пирĕншĕн кашни ача пĕр тан

Эпир, Атнар вăтам шкулĕн социаллă педагогĕсем, шкул пурнăçĕпе тан утса пыма тăрăшатпăр. Асăннă шкула паян пурĕ 8 ялтан 220 ача пĕлÿ илме çÿрет. Шел пулин те, хăш-пĕр ашшĕ-амăшĕ ачисене кирлĕ пек воспитани парассишĕн тăрăшмасть. Çакăн пек йĕркесĕр çемьесемпе унта ÿсекен ачасем – пирĕн тимлĕхре. Ачасем шкула йĕркеллĕ çÿренине тĕрĕслетпĕр, вĕсемпе тĕрлĕрен калаçусем ирттеретпĕр, ашшĕ-амăшĕсемпе тĕл пулатпăр, час-часах килне те кайса килетпĕр. Хальхи вăхăтра пирĕн шкулти вĕренекенсенчен нихăшĕ те райадминистрацин çул çитмен ачасен комиссийĕн учетĕнче тăманни савăнтарать. Çавăн пекех ачасене опекăна илнĕ çемьесесемпе çыхăну тытма тăрăшатпăр. Паянхи куна ку тăрăхра ашшĕ-амăшĕсĕр юлнă 12 ача шутланать, вĕсене 9 çемьене вырнаçтарнă.

Эпир хамăр ĕçе теори тĕлĕшĕнчен те анлăлатма тăрăшатпăр. Нумаях пулмасть районта «Шаг навстречу» наукăпа практика конференцийĕ иртрĕ. Çакăнта хамăрăн мастер-класа кăтартрăмăр, хÿтĕлев вăхăтĕнче презентаци слайчĕсемпе усă куртăмăр. Кунта виççĕмĕш вырăн çĕнсе илме пултарни пире малалла тата тухăçлăрах ĕçлеме хавхалантарать.