14 января 2009 г.
ЧР Экономика аталанăвĕпе суту-илÿ министерстви пĕчĕк тата вăтам предпринимательствăна аталантармалли муниципаллă программăна пурнăçлама пулăшас тĕллевпе йĕркеленĕ республикăри конкурса хутшăнса Хĕрлĕ Чутай район администрацийĕ грант шучĕпе 275 пин тенкĕ патшалăх пулăшăвне тивĕçнĕ.
Çак укçа-тенкĕне малашлăхлă, экономика енчен кирлĕ бизнес-проектсем валли уйăрнă. Çав шутран пурăнмалли çурт-йĕрпе коммуналлă хуçалăх, халăха йăла пулăшăвĕ парас тытăмсенче, предпринимательствăна аталантарас тĕлĕшпе усă курĕç.
Иртнĕ çулхи ноябрĕн 10-24-мĕшĕсенче пĕчĕк тата вăтам предпринимательствăна вăйлатас тĕллевпе районта конкурс иртнĕ. Унта Туканашри "Дар-Бройлер" чăх-чĕп фабрики 90 пин, "Жилсервис" ТЯО – 70 пин, "Сельэнерго" ТЯО 60 пин тенкĕ çĕнсе илнĕ. Çавăн пекех В.Н.Савинкин уйрăм предприниматель 55 пин тенкĕне тивĕçнĕ.
Çакă паха – районта предпринимательсен йышĕ ÿссе пырать. 2007 çулта вĕсен хисепĕ 205 çынпа танлашнă. 2009 çул тĕлне вара 218 предпринимателе çитнĕ.
Источник: "Пирěн пурнăç"