08 июня 2020 г.
Районта Пĕтĕм тĕнчери ачасене хỹтĕлемелли кун тĕрлĕ уяв мероприятийĕсем ирттересси йăлана кĕчĕ. Анчах та паянхи пандеми вăхăтĕнче халăхăн йышлăн пухăнма юрамасть. Лару-тăрăва шута илсе администраци районти нумай ачаллă çемьесене вĕсем патне çитсе саламлама йышăннă.
Акă июнĕн 1-мĕшĕнче Раççей Федерацийĕн Патшалăх Думин Федераллă Пухăвĕн депутачĕн Николай Маловăн представителĕсем, хăнасем Ачкассинче пурăнакан Мачуженкосен çемйине çитсе уяв ячĕпе саламларĕç, ачасене ноутбук тата пылак парнесем парнелерĕç.
Светлана Витальевнăпа (36 çулта) Андрей Владимировичăн (35 çулта) ултă ача: виçĕ хĕрпе виçĕ ывăл. Чи асли 16 çулта, чи кĕçĕнни икĕ уйăхра кăна-ха. Халĕ телейлĕ амăшĕ декретра ларать. Унччен вăл "Магнит" лавккара сутуçăра тăрăшнă. Мăшăрĕ вара А.Ивантаев уйрăм предприниматель патĕнче тĕрлĕ ĕçсене пурнăçлать. Светлана Витальевна пĕлтернĕ тăрăх, вăл хăйĕн пулас мăшăрĕпе Чулхулана ĕçлеме кайсан паллашнă. Çамрăк мăшăр малтанах Чутайра тĕпленнĕ. Ачкассине пурăнма куçнăранпа вара çулталăк та çитмен. Икĕ хутлă капмар çурта амăшĕн капиталĕпе усă курса туяннă. Унсăр пуçне çемье республикăри амăшĕн капиталне те тивĕçнĕ.
А.ВАСЮКОВА.
Источник: "Пирěн пурнăç"