06 марта 2020 г.
Çапла калаççĕ "Жилсервис" тулли мар яваплă обществăра дворникра 10 çул хушши тăрăшакан Ольга Геннадьевна Митина пирки унăн участокĕнче пурăнакансем.
Хамăр пурăнакан, утса çỹрекен вырăнта тирпей-илем хуçаланни кашнин куçне савăнтарать. Акă Хĕрлĕ Чутай салинче пурăнакан Ольга Геннадьевна Çĕнĕ урамри тăхăр çурта тата вĕсен çывăхĕнчи территорие тирпейлесе-тасатса тăрать. Ир-ирех ĕçе утакансем хăнăхнă вăл çулла е урам шăлнине, е çỹп-çап пуçтарнине, е курăк çулнине, хĕлле çула юртан тасатнине е пăр катнине. Вăл пăхса тăракан çуртсенчи подъездсенче те çутă та таса. Пăрчăкан пек вăр-вар хĕрарăм урайне 10 кунта пĕрре çуса тăрать, кашни пилĕк кунта шăлса пуçтарать. Мухтаççĕ ăна пурăнакансем.
Мăшăрĕпе, Алексей Ивановичпа, хĕрпе ывăл ỹстерсе ура çине тăратма пултарнă. Юлашки çулсенче мăшăрĕ республика тулашне вахтăпа ĕçлеме çỹрет. Килте пулнă хушăра Алексей мăшăрне пулăшма та вăхăт тупать: çулла-тăк урамра çỹп-çап пуçтарса парать, хĕлле-тĕк юр утса пулăшать.
Ĕçри тăрăшулăхне кура кăçал Ольга Геннадьевна Митинан сăнне районăн Хисеп хăми çине вырнаçтарма йышăннă. Çак чыса вăл хăйĕн ĕçĕпе ырă тĕслĕх кăтартнăшăн, район пурнăçне лайăхрах тума тăрăшнăран тивĕçнĕ.
А.ВАСЮКОВА.
Источник: "Пирěн пурнăç"