Публикации » Ĕмĕр сакки сарлака

Пурнăçра çын темĕн те тÿсет. Трапай ялĕнче ĕмĕрне ĕмĕрлекен Мария Ивановна Сазанова та кăçал 80 çул тултарнă. Сахал мар ку. Унпа калаçса ларнăччĕ те, темĕнле йывăрлăх та курнă пулин те, кăмăлĕпе хуçăлманнинчен тĕлĕннĕччĕ. Ара вăл вăхăтри çынсен пурнăçĕ çăмăл килмен-çке. Йышлă çемьере ÿснĕ – ултă ача. Вăл чи асли пулнă. Вăрçăран суранланса таврăннă ашшĕ нумай пурăнайман, амăшĕ те тăватă теçетке урлă каçсан çĕре кĕнĕ. Пĕр тăвансем пĕр-пĕрне пулăшса пурнăç çулĕ çине тăнă.

Мария Ивановна ялтах хăй телейне тупнă. Леонид Иванович уншăн чăн-чăн çемье тĕрекĕ пулнă. Вĕсем виçĕ ача çуратса ÿстернĕ. Хĕрĕсем тĕрлĕ хуласенче пурăнаççĕ, ывăлĕ – Шупашкарта. Мăшăрсем ĕмĕрĕпех тăван колхозра тăрăшнă. Леонид Ивановича ĕçри хастарлăхшăн «Чи лайăх тракторист» ят парса чысланă. Шел те, çемье пуçлăхĕ ултă çул каялла çĕре кĕнĕ. Ун хыççăн Мария Ивановнан сывлăхĕ хавшама пуçланă. Урисем хытах сураççĕ. Кинемей халĕ икĕ туя çине таянса çеç утаять. «Çамрăк чухне йывăрлăх курни халĕ хытах систерет», – тет ветеран.