Публикации » Тулăх апатсăр, ăшă витесĕр продукци илеймĕн

Халĕ уй-хирте тырă вырнипе пĕрлех ял ĕçченĕсем выльăх апачĕ те хатĕрлеççĕ. Çавăн пекех фермăсене юсас ĕç пырать. Çак ыйтусемпе интересленсе эпир район администрацийĕн ертсе пыракан специалист-эксперчĕпе Алевтина Викторовна Елизаровапа курса калаçрăмăр.

Хĕл кунĕсенче выльăх-чĕрлĕхрен ытларах продукци илес тесен апат тулăх хатĕрлемелле, витесене юсаса çĕнетмелле ĕнтĕ. Районта ку енĕпе ĕçсем еплерех пулса пыраççĕ;

– Кăçал хуçалăхсенче выльăх апачĕ янтлассине япăх мар йĕркеленĕ. Паянхи кун тĕлне кашни условнăй выльăх пуçне 17,2 центнер апат единици хатĕрлесе хăварнă. Иртнĕ çулхи çак вăхăтра ку хисеп пурĕ те 7,5 центнерпа кăна танлашнă. Чăннипе пирĕн планпа 6273 тонна апат единици пулмалла. Халĕ вара 5642 тонна е палăртнин 90 проценчĕ пур. Ку тĕлĕшпе Никитин фермер хуçалăхĕ, "Коминтерн" тата "Победа" производство кооперативĕсем уйрăмах аван ĕçлеççĕ. Акă, условнăй выльăх пуçне кивирчемессем – 28,6, атнарсем – 24,8, иккĕмĕш хурашашсем 23,5 центнер апат единици янтланă. Шел пулин те, "Асамат", "Телей" хуçалăхсенче выльăх апачĕ хатĕрлес ĕç юлса пырать. Ку мĕн çинчен калать-ха; Ял хуçалăх предприятийĕсене ертсе пыракансем утă, сенаж, силос тăвас енĕпе яваплăха туймаççĕ. Курăк çулса пухмалли техникăпа усă курмаççĕ.

Пĕтĕмĕшле илсен, паянхи кун тĕлне 4091 тонна вырăнне 4176 тонна е 102 процент утă, 3845 тонна вырăнне 7681 тонна е 200 процент сенаж, 17045 тонна вырăнне 6319 тонна е 37 процент силос хывса хăварнă.

– Хăш хуçалăхсенче выльăх-чĕрлĕх витисене юсас ĕç аван пырать; Ăçта вара япăхрах;..

– Тÿрех каламалла, фермăсене хĕле хатĕрлес ĕçе "Коминтерн", "Свобода", "Нива" хуçалăхсенче лайăх йĕркеленĕ. Атнарта та, Анат Çĕрпÿкассинче те ĕне витисене хăй вăхăтĕнче юсаса çĕнетнĕ, сĕт пăрăхĕ вырнаçтарнă. Хальхи вăхăтра вĕсене дезинфекци туса тухмалли, шуратмалли кăна юлнă. "Нива" хуçалăх дирекцийĕ вара Карăкçырминчи пăру витине, Турханти ĕне выльăх самăртмалли витене юсама бригадăсем йĕркеленĕ. Паянхи кун ял ĕçченĕсем хĕрсех строительство ĕçĕсене малалла пурнăçлаççĕ. Çавăн пекех "Победа" кооперативра ĕне фермин картишне юсаса çĕнетнĕ. Анчах шалта нимĕн те туман-ха. "Аккозинский" хуçалăхра кормушкăсем çĕнĕрен янтланă, картишне тирпей-илем кĕртнĕ. Кунтах пăру витине юсанă. Шел, ĕне ферми япăхса кайнă. Вăл йăтăнса анас хăрушлăх та пур. Çакна шута илсе хуçалăх ертÿçисем инвестици кредичĕ илме документсем илме хатĕрлеççĕ.

Выльăх-чĕрлĕх отрасльне кирлĕ пек аталантарассишĕн тăрăшман хуçалăхсем те пур районта. Кун пеккисен шутне чи малтанах "Асамат" обществăна кĕртмелле. Унти фермăсенче юсав ĕçĕсене ирттерме васкамаççĕ. Выльăхсене сутма вара питĕ хыпаланаççĕ. Иртнĕ çулхи августăн 1-мĕшĕ тĕлне кунта 984 ĕне выльăх пулнă. Кăçал вара пурĕ те 453 пуç кăна юлнă. Урăхла каласан 531 пуç чакарнă!

"Авангард" кооперативра та выльăхсем çине тимлĕх уйăрмаççĕ. Кунта тислĕк пухăнса кайнă, ăна çурт çумнех купаласа хунă. Çапла тыр-пул тухăçне ÿстерме май паракан лайăх удобрени сая кайса выртать. Ăна хăçан лаптăксене илсе тухасси те паллă мар.

"Путь Ильича" хуçалăх выльăх-чĕрлĕх продукчĕсем илессипе кайра çапкаланса пырать. Ăçтан-ха вăл малти рете тухма пултарĕ; Акă, Шулю фермине çитсен кунта хуçалăхсăрлăх хуçаланнине курма пулать. Витесене хăçан йĕркене кĕртме пуçласси те паллă мар.