Публикации » Сывă та телейлĕ пуласчĕ

Апрелĕн 13-мĕшĕнче Шулю шкулĕнче "Сывă пурнăç йĕркишĕн" темăпа мероприяти иртрĕ. Унта çул çитменнисемпе ĕçлекен инспектор Н.Н.Аливанкина, районти ГИБДД уйрăмĕн инспекторĕ А.А.Майоров, И.Ф. Кораков участковăй хутшăннине палăртмалла.

Чи малтанах 18 çул тултарман çамрăксемпе ĕçлекен Н.Н.Аливанкина эрехпе сăра, пирус сиенĕ çинчен каласа пачĕ. Вăл палламан çынсемпе пуплеме, вĕсенчен нимĕн те илме юраманни пирки пĕлтерчĕ, хĕрсемпе каччăсене ырă сĕнÿсем пачĕ.

Унтан ГИБДД инспекторĕ А.А.Майоров сăмах илчĕ, çанталăк ăшăтнă тата çулсем типнĕ май чылай ача урамра велосипедпа ярăнма тытăнни пирки каларĕ. 14 çул тултарман çамрăксен велосипедпа шоссе çине тухма юраманнине çирĕплетрĕ вăл. Скутерпа ачасен пушшех те çÿремелле мар.

Вĕренекенсем хăнасене интересленсех итлесе ларчĕç, ыйтусем те пачĕç. Апла пулсан, çамрăксем малашлăх пирки шутлаççĕ. Ырă мар ĕçсемшĕн хăçан та пулин яваплăх тытма тивнине кашни ăнлансан питĕ лайăхчĕ. Сывă та телейлĕ пулнине мĕн çиттĕр ĕнтĕ.