Публикации » Тимсĕрлĕх хакла ларать

25 марта 2009 г.

Асăрханусăрлăхпа тимсĕрлĕх хăш-пĕр чухне хакла ларма пултарать. Уйрăмах ача-пăчапа сыхлануллă пулмалла. Вĕсене вĕт-ха тавралăхри пур япала та интереслентерет, пурне те алăпа тытса пăхас килет. Чăваш çыртса пăхмасăр ĕненмест текен каларăшри пекех ача-пăча та кашни япалана çăвара хыпса тĕрĕслет. Сиенсĕр япаласем пулсан юрĕччĕ-ха. Сывлăха сиен кÿрекен эмелсем, çĕçĕ-хачă таврашĕ, пăта... ал айĕнче пулсан вара инкек пуласса кĕтмелли çеç юлать. Çавăнпа та ача-пăчана сиенлекен хăрушă япаласене тĕплĕнрех пуçтарса хума тăрăшмалла. Унсăрăн мĕн ĕмĕр тăршшĕпе ÿкĕнĕн. Çакна нумаях пулмасть Шулю ялĕнчи 3 çулхи ача колорадо нăррине вĕлермелли шĕвеке тутанса пăхса наркăмăшланни аванах çирĕплетет. Сăмах май, çак хушăра районĕпе пĕчĕк ачасем наркăмăшланнă 3 тĕслĕх пулнине палăртнă.

Источник: "Пирěн пурнăç"