28 мая 2007 г.
Майăн 25-мĕшĕнче, ытти çĕрти пекех, Именкасси вăтам шкулĕнче те юлашки шăнкăрав уявĕ пулчĕ. Çак ятпа кăнтăрла иртсен шкул умĕнче савăнăçлă линейка иртрĕ. Чăваш ялавне чăваш гимнĕ янăранă май Т. Александрова (10 кл.), А. Петров, А. Осипов вĕренекенсем (9 кл.) хăпартрĕç. Шкул директорĕ О. Арманова вĕренекенсене экзаменсем тытма ирĕк пани çинчен калакан приказпа паллаштарчĕ, кăçал шкултан вĕренсе тухакансене (вун виççĕн), ытти классенче вĕренекенсене экзаменсене ăнăçлă тытмашкăн ырă сунчĕ, РФ Патшалăх Думин депутачĕн А. Аксаковăн саламĕпе паллаштарчĕ. Уяв ячĕпе вĕренекенсене Чăваш Республикин “Красноармейски издательство çурчĕ” предприятийĕн директорĕ-тĕп редакторĕ И. Прокопьев, Еншик Чуллă ял тăрăхĕн пуçлăхĕ Г. Васильев, ашшĕ-амăшĕсен ячĕпе Ю. Федорова, Л. Осипова, вун пĕрмĕшсен малтанхи учительници пулнă Л. Андреева ăшшăн саламларĕç. Т. Александрова (10 кл.) районти вĕренекенсем хушшинче хими предмечĕпе, нимĕç тата вырăс чĕлхисемпе, Н. Осипов (9 кл.) физкультурăпа, И. Андреева (4 кл.) чăваш чĕлхипе, А. Осипов (9 кл.) биологипе, А. Петров (9 кл.) химипе ирттернĕ, С. Яковлева (10 кл.) чăваш чĕлхи кунне халалланă олимпиадăсемпе вăйăсенче малти вырăнсене йышăннăшăн, Е. Владимирова (5 кл.) “Çамрăк техниксем кадрта” фотоконкурсра, О. Афанасьева (5 кл.) çул-йĕр çул çÿревĕн правилисене пĕлессипе районта мала тухнăшăн, С. Осипов (11 кл.) йĕтре тĕртессипе районти ăмăртура виççĕмĕш вырăна тухнăшăн дипломсемпе ытти хисеп хучĕсене тивĕçрĕç. Вун пĕрмĕшсем шкула, учительсемпе шкулти ытти ĕçченсене (вăл шутра вун пĕрмĕшсен пĕрремĕш учительници Л. Андреева, хальхи класс ертÿçи Е. Александрова, шкул директорĕ О. Арманова та пулчĕç) пĕлÿ илме пулăшнăшăн ятран асăнса чĕререн тав турĕç, савăк юрăсем шăрантарчĕç, шкула, юратнă учителĕсене, пĕрремĕш классене, пĕрремĕшсем вун пĕрмĕшсене асăнмалăх парнесемпе чысларĕç. Тăххăрмĕшсем вырăс чĕлхипе литературине вĕрентекен И. Петрована çуралнă кун ячĕпе саламларĕç.
Вун пĕрмĕш класри А. Степановпа 1-мĕшĕнчи М. Степанова юлашки урока кĕрсе лармашкăн шăнкăрава янраттарчĕç.
Çав кун вун пĕрмĕшсем шкул автобусĕпе ашшĕ- амăшĕсемпе пĕрле Шупашкара Атăл хĕррине экскурсие кайса килнĕ.
Источник: "Ял пурнăçĕ" (Красноармейская районная газета)