17 апреля 2009 г.
Ака уйăхĕн 5-мĕшĕнче, вырсарни кун, Еншик Чуллăри вăтам шкулта волейболла выляса пĕр тăван Батраковсен парнисене тивĕçессишĕн IV турнир иртрĕ.
Кăштах историрен. Батраковсем — Еншик Чуллăра хисеплĕ çынсем. Пĕр ăру туратĕнчен йышлăн вĕсем. Акă, Петĕрĕн ывăлĕсене — Семен, Борис, Александр, Федор, Петр Батраковсенех илер-ха. Ал-ура çыпăçулăхĕпе, кирек епле ĕçе те ăнтарнипе палăрнă кĕреш юман пек ку маттурсем. Шел, пирĕн хушăра халĕ Борис Петрович çеç пурăнать. Аслисен ят-сумне халăхра хăварас тĕллевпе шăпах çакнашкал турнир йĕркелес шухăш çуралнă та кĕçĕн ăрури Батраковсен. Юрий Федорович (вăл тулли мар яваплă “СтройПромСервис” пĕрлешÿн финанс директорĕнче ĕçлет), Вячеслав Федорович (тăван ялти предприниматель) тата Сергей Петрович (районти шалти ĕçсен пайĕн пуçлăхĕн çумĕ) пĕр пулса, пĕрремĕш ăмăртăва 2006 çулхи ака уйăхĕн 29-мĕшĕнче йĕркеленĕ. Иккĕмĕшĕ — виçĕм çулхи нарăс уйăхĕн 25-мĕшĕнче, виççĕмĕшĕ пĕлтĕрхи пуш уйăхĕн 1-мĕшĕнче иртнĕ. Çак тапхăрта унта хутшăннă командăсен те, спонсорсен те йышĕ самаях ÿснĕ. I—III турнирсен çĕнтерÿçи “Трак ен” команда пулса тăнă.
Хальхинче те, акă, хăнасене çăкăр-тăварпа кĕтсе илчĕç, спортзалта парада йĕркеленсе тăнă волйболистсен командисене вара уявпа ăмăрту йĕркелÿçисенчен пĕри — Шупашкарти тулли мар яваплă “СтройПромСервис” пĕрлешÿн финанс директорĕ Ю. Ф. Батраков, Еншик Чуллă ял тăрăхĕн специалисчĕ О. В. Афанасьева, вырăнти А. Г. Николаев летчик-космонавт ячĕллĕ вăтам шкул директорĕ, район депутачĕсен Пухăвĕн депутачĕ Т. А. Беззубова, “Трак ен” ентешлĕх правленийĕн председателĕ, ку ятлă команда капитанĕ А. Н. Львов саламларĕç, спорт çирĕп сывлăхлă пулма май панине аса илтернĕ май, вăйăсене çĕнтерÿпе вĕçлеме ăнăçусем сунчĕç. (Каярахпа спортсменсене район пуçлăхĕ С. А. Николаев та ырă та ăшă сăмахсем каларĕ).
Раççей Гимнĕ мăнаçлăн янăранă хыççăн Еншик Чуллă шкулĕн 10-мĕш класĕнче вĕренекен Елена Николаева волейболистсемпе хăнасене çĕкленÿллĕ юрă парнелерĕ.
Кĕçех вăйăсем пуçланчĕç. Вĕсем çав тери хĕрÿ иртрĕç. Хĕрсен командисем (вĕсем 5) — кунти спортзалтах, арçынсен вара (пурĕ 7 команда) Красноармейскинчи физкультурăпа сиплев комплексĕнче тупăшрĕç. Хамăр районтисемсĕр пуçне волейболистсем Шупашкар хулипе Куславкка районĕнчен те килнĕ. Малтисене чыслама пурте каллех Еншик Чуллă шкулне пухăнчĕç. Çĕнтерÿçĕсем арçынсенчен — “Трак ен” команда (4-мĕш хут ĕнтĕ, маттур!), куславккасем тата Чăваш патшалăх ял хуçалăх академийĕнче вĕренекенсем, хĕрарăмсенчен “Надежда”, “Оникс” тата “Газпром” командăсем пулса тăчĕç. Вĕсене медальсемпе, асăнмалăх футболкăсемпе чысларĕç. Чи лайăх вылякансем те парнесемсĕр юлмарĕç.
Пĕр тăван Батраковсем спорт праçникне чăваш эстрада çăлтăрĕсене — Катя Петровапа Алина Федорована та чĕннĕ. Вĕсен çĕкленÿллĕ юррисем турнира татах та уяв сăнĕ кĕртрĕç. Пурне те шкул столовăйĕнче йĕркелÿçĕсем тутлă шÿрпепе хăналарĕç. Çитес турнирччен эппин, туссем!