Публикации » Услантăр Енĕшрен Пайсупина — асфальтлă çул

Республика Президенчĕн Николай Федоровăн хушăвĕпе килĕшÿллĕн, 2 çул хушшинче кашни яла асфальтлă е хытă сийлĕ çулсемпе çыхăнтарма йышăннă. Акă, ЧР “Чăвашавтоçул” патшалăх унитари предприятийĕн Вăрнарти çул-йĕрпе строительство управленийĕн ĕçченĕсен пĕр ушкăнĕ Услантăр Енĕш — Пайсупин çулĕ çинче ĕçлет. Кунта пĕтĕмпе 3, 8 километр чухлĕ дамба хăпартса асфальт сармалла. Пысăк ĕç калăпăшлă — 32 миллион та 500 пин тенкĕлĕх — участокра, Пайсупин çывăхĕнче, строительсем хушшинче, çурла уйăхĕн 5-мĕшĕнче пулма тÿр килчĕ. Кунта Виталий Николаевич Иванов маçтăрпа калаçрăм. Кăмăллă арçын, пурнăçланă ĕçсен калăпăшĕпе тата çул-йĕр строителĕсемпе паллаштарчĕ.

— Паянхи кун тĕлне дамба хăпартас ĕçе вĕçлесе пыратпăр. Унпа пĕрлех 1, 5 километр чухлĕ çула пусăрăнтарса хăйăр сарса тухнă. Манăн участокра хăватлă тăватă Т-130, пĕр Т-330 бульдозер ĕçлеççĕ. Çавăн пекех виçĕ грейдер тата икĕ каток вăй хураççĕ — терĕ Виталий Николаевич.

Вĕсене ĕçлеттерекенсем Василий Иванов, Алексей Николаев, Николай Никандров тата ыттисем те.

Тăрăшаççĕ строительсем. Тĕллев пĕрре — кăçалхи октябрĕн 1-мĕшĕ тĕлне çула хута ямалла.