18 января 2008 г.
Январĕн 9-мĕшĕнче Красноармейскинчи 2-мĕш шкулта районти физкультура юхăмĕн ветеранĕн вĕренекенĕсем пуçарнипе ЧР тава тивĕçлĕ учительне М. И. Ильина чысласа шкул ачисен командисем хушшинче шашка турнирĕ иртрĕ. Ăна Михаил Ильич 80 çул тултарнине халалланă. Турнира 10 команда хутшăнчĕ.
М. Ильин вĕрентсе хатĕрленĕ командăсем шашкăлла выляса республикăра 13 хутчен (юлашки хут 2005 çулта) мала тухнă, вырăс лапти выляссипе пĕрре кăна мар призерсем пулса тăнă. Михаил Ильич республикăри чи вăйлă шашистсенчен пĕри шутланнă: 2 хутчен республикăра çĕнтернĕ, пĕр хутчен ялти шашистсем хушшинче Раççейре мала тухнă, шашкăлла выляса спорт мастерĕн кандидачĕн нормативне пурнăçланă. Иртнĕ ĕмĕрĕн 60—70-мĕш çулĕсенче чушкăлла выляс енĕпе чи вăйлă вăйăçă та пулнă вăл, район командин йышĕнче республикăра мала тухнă, Кострома хулинче иртнĕ Пĕтĕм Раççейри ăмăртусене хутшăннă.
Спорт ветеранне чысласа ирттернĕ ăмăртура райцентрти иккĕмĕш шкулти вĕренекенсем çĕнтерчĕç. Карайсемпе чатукассисем — иккĕмĕшпе виççĕмĕш вырăнсенче. Турнирта палăрнисем М. Ильин вĕренекенĕсемпе пĕр тăван Алексеевсен хаклă парнисене тивĕçрĕç.
Источник: "Ял пурнăçĕ" (Красноармейская районная газета)