05 марта 2013 г.
Красноармейски ял тăрăхĕнчи ялсенче те граждансен пухăвĕсем иртрĕç.
Çавăн пек пуху Янкасри библиотекăра иртрĕ. Унта Янкас, Хĕлеç, Чаканар ялĕсенче пурăнакансем пуçтарăнчĕç.
Кун йĕркипе килĕшÿллĕн, ял тăрăхĕн администрацийĕ 2012 çулта еплерех ĕçлесе пыни çинчен унăн пуçлăхĕ Э. Ермаков каласа пачĕ, 2013 çулхи тĕллевсемпе паллаштерчĕ.
Хальлĕхе Янкас енче те татса паман ыйтусем пур-ха. Вĕсем пирки ял тăрăхĕн администрацийĕ пĕлсе тăрать, тивĕçтерме майсем шырать. Çапах та пухура тухса калакансем хăйсен пăшăрханăвĕсене те уçса пачĕç. Сăмахран, А. Илларионова Янкасри медпункта сыхласа хăварасси, ăна валли хăтлă çурт уйăрасси пирки каларĕ. А. Антонована кунти ача сачĕ тепĕр хут хăçан ĕçлеме тытăнасси канăç памасть. Ю. Ефремова урамсенче тирпей-илем тăвас ыйтăва хускатрĕ, сĕнÿсем пачĕ. Çавăн пекех ирĕкре çÿрекен хуçасăр йытăсем пирки асăнчĕ. В. Григорьев ялсенчи униче картисене юсаса йĕркене кĕртес пирки чарăнса тăчĕ, урамсенчи юпасем çинче çĕнĕ электролампочкăсем лартмаллине пĕлтерчĕ, масар çине каякан çула юсамаллине те систерчĕ. Л. Иванов вара Янкасри пуçламăш пĕвене тасатма, ун тавралла йывăçсене касса тирпейлеме, унтах пушар машинипе шыв илмелли площадка тума ыйтрĕ, ял хушшинче çÿп-çап пухса пымалли контейнерсем вырнаçтарма май çук-ши, терĕ. Вăлах ялта чылайранпа староста çукки пирки каларĕ, администрацинче вăй хуракансене ялсене час-часах килсе çÿресе çынсемпе тĕл пулусем йĕркелеме сĕнчĕ.
Сÿтсе явнă ыйтусем тăрăх пуху тивĕçлĕ йышăнусем турĕ. Ял тăрăхĕн администрацийĕн ĕçне вăтам тесе хакларĕ.
Э. Ермаков пухăннисене “Ял тăрăхĕн хисеплĕ гражданинĕ” ят парас енĕпе ял тăрăхĕн депутачĕсен Пухăвĕн йышăнăвĕпе паллаштарчĕ. Районти Н. Янкас ячĕллĕ пĕрлĕх ертÿçи Г. Ефимов пĕрлĕх правленийĕн йышăнăвĕпе килĕшÿллĕн çак чыслă ята илме пĕрлĕхĕн хисеплĕ ертÿçине, Янкасра пурăнакан Н. Ершов кандидатурине сĕнчĕ. Пухăннисем çак сĕнÿпе пурте килĕшни çинчен пĕлтерчĕç.
Юлашкинчен Янкас енчи ялсенчи ветерансен канашĕн ертÿçи Ю. Ефремова 80 çул тултарнă май, Э. Ермаков ăна администрацин Хисеп хучĕпе чысларĕ, парне пачĕ. Ветерансен районти канашĕн председателĕ Г. Ефимов саламласа тав турĕ. Ял тăрăхĕн информаципе культура центрĕн юрăçисем пĕчĕк концерт кăтартрĕç.
Источник: "Ял пурнăçĕ" (Красноармейская районная газета)