Публикации » Ман пек нумай пурăнăр

“Ман пек нумай пурăнăр”, — терĕ Янкас ялĕнче пурăнакан Екатерина Захаровна Захарова хăйне сумлă юбилей ячĕпе саламлама килнисене.

Вăл 1918 çулхи раштав уйăхĕн 3-мĕшĕнче Упи ялĕнче çĕр çине килнĕ. Ачаллах ĕçе кÿлĕннĕ. Ăна ферма заведующийĕ пулма та шаннă. “Çăмăл лекместчĕ. Ÿркенмен. Сĕт сăвассипе малта та пынă”, — аса илчĕ çав вăхăтсене Екатерина Захаровна. Вăрçă йывăрлăхĕсене те тÿсĕмлĕн чăтса ирттернĕ: хĕлле вăрман каснă, çулла колхозра тар тăкнă.

1944 çулта Е. Захарова Янкас ялĕнчи В. Борисовпа çемье çавăрнă. Василий Борисович ун чухне вăрçăран аманса таврăннă пулнă. Иккĕшĕ те колхозра вăй хума тытăннă. Кăвак шуçăмла ура çине тăнă та сĕм çĕрлечченех хуçалăхри ĕçсене тунă. Вĕсем вара ик ал валли тупăнсах тăнă. Мĕн тивĕçлĕ канăва тухичченех тимленĕ “Звезда” колхоз уй-хирĕнче Елена Захаровна та, çавăншăн “Хисеплĕ колхозница” ята та, “Тăван çĕр-шывăн 1941—1945 çулсенчи Аслă вăрçи вăхăтĕнче хастар ĕçленĕшĕн”, “Ĕç ветеранĕ” медальсене те, тĕрлĕ тав хучĕсене те тивĕçнĕ.

Мăшăрĕпе икĕ ача çуратса ура çине тăратнă. Аслă ывăлĕ — Александр — тăван хуçалăхра сварщикре вăй хунăскер, пурнăçран иртерех уйрăлнă. Хĕрĕ — Фаина — тивĕçлĕ канура пулин те, тулли мар яваплă “Красное Сормово” пĕрлешÿн Яманакри сĕт-çу ферминче техник-осеменаторта тимлет, ырă ят çĕнсе илнĕ.

Екатерина Захаровна халĕ кинĕпе — Зоя Васильевнапа — пĕрле пурăнать. Çу кунĕсенче пахчана утă тавăрма та тухать. Хăйне япăх мар туять. Тăватă мăнукĕпе тата вĕсен тăватă ачипе, Упипе Янкас тăрăхĕсенчи тăванĕсемпе калаçса чунне йăпатать. Сывлăх хавшанă тесе, сыватмăш çул-йĕрне такăрласах кайман вăл. Килте ĕне тытаççĕ те, сĕт-турăхĕ питех те шеп уншăн.

95 çулхи юбилейĕ ячĕпе Е. Захарована район администрацийĕн пуçлăхĕ А. В. Шестаков чунтан-чĕререн тухакан ăшă сăмахсемпе саламларĕ, татах та нумай çул савăнтарса пурăнма çирĕп сывлăх сунчĕ. Андрей Владимирович Екатерина Захаровнана Раççей Федерацийĕн Президенчĕ В. В. Путин ун патне ятарласа янă саламлă телеграммăпа паллаштарчĕ, парне кÿчĕ. Салтак арăмне, ĕç ветеранне пурнăçри сумлă кун ячĕпе çавăн пекех Красноармейски ял тăрăхĕн пуçлăхĕ Э. Ю. Ермаков тата ĕçпе вăрçă ветеранĕсен вырăнти канашĕн председателĕ Ю.Н. Ефремова ыр сунчĕç. ЧР культурăн тава тивĕçлĕ ĕçченĕ Анатолий Алексеев тата Светлана Васильева юрăç кинемин чун-чĕрине чăвашсен савăк юррисемпе савăнтарчĕç. Е. З. Захарова вара пурне те пур кăмăлтан тав турĕ.