14 декабря 2012 г.
Сывлăх — çынăн чи хаклă пуянлăхĕ. Çавăнпах ăна упрасси тата çирĕплетсе пырасси пирки тĕрлĕ шайра нумай калаçаççĕ. Чирлес-тăвас пулсан, çийĕнчех сипленме çине тăмалла. Ку чухне çийĕнчех тухтăрсем патне васкамалла. Çаплах тăватпăр-та.
Райбольница пирки хамăр тăрăхра пурăнакансем тĕрлĕрен сăмахлаççĕ: пĕрисем тухтăрсен ĕç-хĕлне ырлаççĕ, вĕсене тав тăваççĕ, теприсем критиклеме те пăхаççĕ (тĕрĕс критикăна шурă халатлисем пĕртте йышăнмасăр тăмаççĕ). Çапах та пĕрремĕшĕсем ытларах, ара, хăвна сиплесе ура çине тăратакан тухтăра хурлама чĕлхе епле çаврăнайĕ-ха? Чир-чĕре парăнтарнисем вăл е ку тухтăрпа ăшшăн сывлăх сунмасăр нихăçан та иртмеççĕ.
Красноармейски тĕп больницин тĕп тухтăрĕнче Л. А. Матвеев ĕçлеме тытăннăранпа вăхăт нумай иртмерĕ-ха. Леонид Алексеевич çак тапхăрта кашни уйрăм ĕçĕ-хĕлĕпе тĕплĕн паллашрĕ, çынсемпе курнăçса калаçрĕ, вĕсен шухăшĕсене ыйтса пĕлчĕ, сĕнĕвĕсене итлерĕ. Ырă хăш-пĕр улшăнусем вырăн тупрĕç те ĕнтĕ.
Акă тĕп врач хушăвĕпе çак кунсенче тĕп больница поликлиникин регистратурипе гардеробĕ, анализсем çырса паракан пÿлĕмне юн, шăк илекен лаборатори куллен ирхине 7 сехет те 30 минутран ĕçлеме пуçăнчĕç. Венăран юн илмелли уйрăм та çак вăхăтранах йышăнать. Ку çĕнĕлĕх тухтăрсем патне кĕмелли анализ-хутсене туллин тата çийĕнчех хатĕрлеттерме май парать. Хальлĕхе çак уйрăм медицина сестрисем тивĕçменнипе пĕр сменăпа кăна ĕçлет-ха. Çапах та Л. А. Матвеев тĕп врач кунта икĕ смена йĕркелес шухăшпа пурăнать.
Поликлиника çумĕнчи кăнтăрла сипленмелли уйрăмра (стационарта) кашни кунах чирлĕ 7 çын сывалма пултарать. Унсăр пуçне кунти процедура тăвакан пÿлĕмре тимлекен С. Владимировапа Г. Михайлова медицина сестрисем те сире яланах хапăл туса йышăнĕç. Пĕр сăмахпа, районти тĕп больницăра ĕçлекенсем чирлĕ çынсене медицина пулăшăвĕ кÿме яланах хатĕр.
Источник: "Ял пурнăçĕ" (Красноармейская районная газета)