04 апреля 2013 г.
Маларах Красноармейскинчи çĕнĕ микрорайонти Моркинская урамра полиэтилен пăрăхсемпе усă курса кĕске вăхăтрах пĕр çухрăм тăршшĕ газ трасси хыврĕç. Çак кунсенче вара Траковская урамра çавăн чухлĕ тепĕр газ пăрăхне хывассине вĕçлерĕç. Кунтах нумай ачаллă çемьесен Çамрăксен урамĕ те вырнаçнă. Унта “сенкер çулăмпа”, электроэнергипе тата ĕçмелли шывпа тивĕçтерессипе проектпа смета докуменчĕсене хатĕрлесе çитернĕ, патшалăх экспертизи витĕр кăларса ĕçе пуçăннă, — тет Красноармейски ял тăрăхĕн пуçлăхĕн çумĕ В. Трофимов. — Урамсенчи полиэтилен пăрăхсене хывса тухсан, çемьесем килĕсене газпа хутса ăшăтмалла тăвассипе тăрăшĕç.
Асăнма кăмăллă: çĕнĕ микрорайонти урамсене газ трасси хывса хăварас çĕрте район администрацийĕн пуçлăхĕ А. В. Шестаков та нумай тÿпе хывать.
Траковская урамра газ трассине хывнă çĕрте “Цивильскмежрайгазăн” Красноармейскинчи участокĕнчи (начальник тивĕçĕсене пурнăçлаканĕ В. Петров) Владимир Данилов, Анатолий Павлов, Виталий Дмитриев слесарьсем, тăван кĕтесе Шупашкарти управленирен техникăпа трасса хывма килнĕ Владимир Григорьев тăрăшулăх кăтартрĕç. Вĕсеннех çитес кунсенче шыв кĕртессипе те ĕçлемелле. Ку микрорайонта пурăнакансем “Цивильскмежрайгаз” пĕрлешÿ ертÿçине, хамăр ентеше В. Филиппова та тав тăваççĕ.
Трасса хывнă чухне чăрмавсем тупăннине те пытарма юрамасть. Чылай çурт умĕнче бетон плитасемпе блоксем купаласа тултарнине, вĕсене вырăнтан куçарассипе самаях тертленме, хаклă вăхăта çухатма тивнине палăртрĕç газ пăрăхĕ хывакансем. Юрать-ха Красноармейски ял тăрăхĕн пуçлăхĕ Э. Ю. Ермаков хăватлă техника тупма пултарчĕ.
Хăй вăхăтĕнче мана РСФСР ял хуçалăх строителĕсен ертÿçисен шкулĕнче вĕренме тÿр килчĕ. Унта пухнă опыт ĕçри йывăрлăхсене çĕнме пулăшса пычĕ, пулăшать те. Акă, Траковская, Новая, Дружба урамсене шыв кĕртессине 3 çул каяллах патшалăх экспертизи витĕр кăларни те çак ĕçе тума пулăшса пырать.
Юлашки вăхăтра ял хуçалăх строительстви пирĕн районта та кÿршĕсемпе танлаштарсан, ÿссе лайăхланса пырать. Çапах та ку отрасль пуçĕнче тивĕçлĕ пĕлÿллĕ специалист кирлех тесе шутлатăп.
Источник: "Ял пурнăçĕ" (Красноармейская районная газета)