Чÿк уйăхĕн 12-мĕшĕнче Шупашкарта, “Мега Молл” суту-илÿ центрĕн Кăвак залĕнче, Раççей Перекет банкне йĕркеленĕренпе 171 çул çитнине халалласа, пресс-конференци иртрĕ.

Ăна Атăл-Вятка банкĕн председателĕн çумĕ — уçă йышши “Раççей Перекет банкĕ” акционер пĕрлешĕвĕн Чăваш Енти 8613-мĕш номерлĕ уйрăмĕн управляющийĕ В. Н. Александров уçрĕ. Вячеслав Николаевич электронлă презентаци мелĕпе Раççей Перекет банкĕпе унăн республикăри уйрăмĕн ĕçĕ-хĕлĕпе паллаштарчĕ. Акă Раççейре банкăн — 19 пин, ют çĕр-шывсенче 1300 филиалĕсем ĕçлеççĕ. Раççей Перекет банкĕнче 240 пине яхăн сотрудник вăй хурать. Чăваш Енте унăн 222 подразделенине йĕркеленĕ, вĕсенче 2189 çын тимлет.

Управляющипе унăн çумĕсем — К. В. Киргизов, А. А. Пищик тата А. Н. Малышев пресс-конференцине хутшăннă республикăри ял тăрăхĕсен уйрăм пуçлăхĕсемпе массăллă информаци хатĕрĕсенче ĕçлекенсене банк тытăмĕнче юлашки вăхăтра пулса иртнĕ тата иртекен çĕнĕлĕхсемпе ырă улшăнусем çинчен электронлă презентаци мелĕпе каласа пачĕç. Унтан вĕсем пухăннисен ыйтăвĕсене хуравларĕç, çав шутра пирĕн районти Алманч ял тăрăхĕн пуçлăхĕн В. В. Долговăнне те.

Юлашкинчен В. Н. Александров управляющи килти хушма хуçалăха аталантарма 2012 çулхи август-сентябрь уйăхĕсенче чи нумай кредит илсе конкурсра мала тухнă ял тăрăхĕсене дипломсемпе тата парнесемпе чысларĕ. Ку чыса тивĕçнисен йышĕнче пирĕн районти Красноармейски ял тăрăхĕ те пулчĕ. Унăн пуçлăхне Э. Ю. Ермакова дипломпа пĕрлех парне — цифрăллă “Триколор. ТВ” спутник приемникĕ — пачĕ.