Публикации » Нумай ачаллă çемьесен — çĕнĕ урам

ЧР Президенчĕн 2011 çулхи мартăн 4-мĕшĕнчи “Чăваш Республикинчи нумай ачаллă çемьесене пулăшу кÿрес тĕллевпе хушма мерăсем çинчен” Указне пурнăçласа Красноармейски ялĕнчи кăнтăр-хĕвел тухăç урамĕнче çĕнĕ урам йĕркеленет.

Кăçалхи юпа уйăхĕн тĕлне Красноармейски ял тăрăхĕнче уйрăм çурт-йĕр çĕклеме тата килти хушма хуçалăха аталантарма çĕр ыйтса нумай ачаллă 25 çемье черетре тăнă.

Октябрĕн 26-мĕшĕнче райадминистрацин ларусен залĕнче савăнăçлă лару-тăрура Красноармейски ял тăрăхĕнчи нумай ачаллă çемьесене тÿлевсĕр майпа çĕр участокĕсем илни çинчен сертификатсем пачĕç. Çав ятпа вĕсене район администрацийĕн пуçлăхĕ А. Шестаков тата ЧР юстици министрĕ Н. Прокопьева саламларĕç. Ун хыççăн алла сертификат илнĕ çĕр участокĕсен хуçисем хăйсен пулас Çамрăксен урамне çул тытрĕç, йывăçсем лартса хăварчĕç.

Çывăх вăхăтра Кĕçĕн Шетмĕ тата Чатукасси ял тăрăхĕсенчи нумай ачаллă çемьесем те çакăн йышши сертификатсем илĕç. Ытти ял тăрăхĕсен пуçлăхĕсене те чÿк уйăхĕн çурриччен кăçалхи октябрĕн 14-мĕшĕ тĕлне тÿлевсĕр çĕр участокĕ илме черетре тăнă нумай ачаллă çемьесен ыйтăвĕсене туллин татса пама хушнă.