26 октября 2010 г.
Атăл çире кăçал çу питĕ шăрăх пулчĕ. Пирĕн республикăра Атăл леш енче пушарсем алхасрĕç. Вĕсем Северный тата Первомайски поселокĕсемпе унта пурăнакансем умне пысăк хăрушлăх кăларса тăратрĕç.
Пĕрлехи вăйпа çеç аркатуллă вут-кăвара çăварлăхлама май килнĕ. Раççейри чрезвычайлă лару-тăру министерствин Чăваш Республикинчи патшалăх управленийĕ хушнипе Красноармейскинчи 32-мĕш пушар чаçĕнче пушар сÿнтермелли икĕ машинăпа 12 çынран Атăл леш енчи вут-кăварпа кĕрешме команда йĕркеленĕ. Ун умне вăрман тивсе илнине пĕтерес тата ялсене вут-çулăмран сыхлас тĕллев лартнă.
Августăн 2—19-мĕшĕсенче пирĕн пушар сÿнтерекенсем çав тери йывăр условисенче ĕçе пĕлсе тата тĕрĕс йĕркеленĕ, вут-кăварпа вилĕмпе кĕрешнĕ пекех кĕрешнĕ.
Вут-кăвара сÿнтерес ĕçре хăюлăхпа паттăрлăх кăтартнăшăн 32-мĕш пушар чаçĕн ĕçченĕсене — караул начальникне Ю. Д. Семенова “За отличие в ликвидации последствий чрезвычайных ситуаций” медальпе, В. Н. Павлов караул начальникне кăкăр çине çакмалли “За заслуги перед Чувашской Республикой” паллăпа тата Чăваш Республикин Хисеп грамотипе чысланă.
Çавăн пекех район администрацийĕн пуçлăхĕ В. В. Александров пушар хуралĕн ĕçченĕсене район территорийĕнче сиксе тухнă çут çанталăк пушарĕсене сÿнтерес çĕрте службăри тивĕçе чыслăн пурнăçланăшăн тав тунă.
Источник: "Ял пурнăçĕ" (Красноармейская районная газета)