19 октября 2010 г.
3-мĕш номерлĕ Янкас суйлав участокĕн комисси председателĕ Н. Николаев ирхине 8 сехетре сасăлав пуçланни çинчен пĕлтерсен, Чаканарта пурăнакан В. Васильев суйлавçă, хăйне панă бюллетеньсене илнĕ май, пурне те çак паллă кун ячĕпе саламласа ырă сунчĕ. Вăл унччен кунти суйлав комиссине чылай çул ертсе пынă.
Кăшт вăхăт иртсен, участока Янкасри чи ватă çынсенчен пĕри — А. Иванова хăех утса çитрĕ. Вăл иртнĕ вăрçăра пуç хунă салтак арăмĕ, çитес нарăс уйăхĕнче 93 çул тултарать.
— Çанталăкĕ лайăх та, хамах килес терĕм. Кашни суйлавах килсе сасăлатăп та — паян та хаваспах хутшăнатăп, — терĕ ватă хĕрарăм. Вулама-çырма лайăх пĕлнĕрен сасăлав йĕркине никам пулăшмасăрах пурнăçларĕ.
Çĕньял Упири 10 ача çуратса пăхса ÿстернĕ героиня А. Нестерова патне комисси членĕсем киле пырса сасăлаттарчĕç. Вăл вара кĕçех 94 çула çитнине паллă тумалла. Каçалапа Янкасран 92 çулхи Е. Захарова суйлава пычĕ.
Çапла сасăлав вăхăчĕ тухичченех пырса тăчĕç суйлавçăсем. Суйлава списока кĕртнисен çурри ытла пайĕ хутшăнчĕ. Сасăсене шутласан, çакă курăнчĕ: ку округсемпе депутат пулма пĕчченшерĕн тăратнă 3 кандидат та, кирлĕ чухлĕ сасă пухса, суйланнă. Красноармейски ял тăрăхĕн пуçлăхĕ пулма кĕрешекен виçĕ кандидатран Э. Ермаков çĕнтернĕ.
Источник: "Ял пурнăçĕ" (Красноармейская районная газета)