27 марта 2020 г.
Вăхăт хăйĕннех тăвать, чупать те чупать. Кашнин хăйĕн ĕçĕ. Кунпа çĕр иртни сисĕнмест, çуркунне кăçал иртерех çитрĕ. Юр хăвăрт пусăрăнчĕ, хуралчĕ, ирĕлме пуçларĕ, кĕçех куçран та çухалчĕ. Шыв юхни те пулмарĕ. Вăрттăн-вăрттăнах таçта кайса пĕтрĕ юр. Часах çанă тавăрса ĕçлемелли вăхăт та çитет. Кашни япалан хăйĕн йĕрки пур, кашни вăхăтăн хăйĕн палли. Çакна шута илсе Карайсем тĕрлĕ ĕç хатĕрĕсемпе масар çине субботника васкарĕç. Кунта ỹссе кайнă ватă йывăçсене касса тирпейлерĕç. В. Павлов, А. Семенов, В. Куприянов, С. Степанов, С. Тимофеев моторлă пăчкăпа йывăçсене касса йăвантарчĕç. Н. Димитриевăпа И. Степанова пуртăсемпе йывăç тĕмисене касрĕç. Е. Федорова, А. Грачева, М. Кузьмина, Н. Любимова, Г. Егорова, Е. Шмурина тата ыттисем те пысăк хастарлăхпа ĕçлерĕç. 5 сехет хушшинче чылай лаптăка тасатса йĕркелерĕç. Субботнике пурĕ 28 çын хутшăнчĕ. Карайпа Çырмапуç тата Кỹлхĕрри ялĕсенчен — чи маттуррисем. Масар çинче тасатмалли татах та нумай. Леш тĕнчене ăсаннисем кашни çемьерех пур. Апла пулсан, пурин те субботниксене кар тăрса хутшăнмалла! Çăваран вăрман тăвас марччĕ.
Г. Егорова.
Источник: "Ял пурнăçĕ" (Красноармейская районная газета)