29 апреля 2011 г.
Ака уйăхĕн 22-мĕшĕнче Шупашкарти “Mega Galaxy” центрта, Чăваш чĕлхи кунне халалласа республикăри “Чăваш пики-2011” V конкурс иртнĕ.
Ăна регионсем хушшинчи “Чăваш наци конгресĕ” тата республикăри çамрăксен “Хастар” обществăлла организацисем Чăваш Республикин культура, национальноçсен ĕçĕсен, информаци политикин тата архив ĕçĕн министрествипе тулли мар яваплă “Cиec” пĕрлешÿ пулăшу панипе йĕркеленĕ.
Чăваш пикине палăртас тĕллевпе ирттернĕ конкурса республикăри районсенчи 12 хĕр хутшăннă. Вĕсем “Визит карточки”, “Ăс-хакăл конкурсĕ”, “Пултарулăх конкурсĕ”, “Чăваш наци апат-çимĕçĕ” тата “Чăваш стилĕ” блоксенче тупăшнă.
Пирĕн район чысне ку конкурсра Кÿлхĕрри ялĕнче çуралнă, халĕ Санкт-Петербургри патшалăх университетĕнчи 1-мĕш курсра вĕренекен Марина Степанова ăнăçлă хÿтĕленĕ. Вăл “Ăс пике” ята тивĕçнĕ. Маринăна çавна май ăшшăн саламлатпăр, ăнăçусем сунатпăр.
Источник: "Ял пурнăçĕ" (Красноармейская районная газета)