04 июня 2010 г.
Ĕнесене искусственнăй майпа пĕтĕлентерекен техник-осеменаторсен конкурсĕ. Унта çÿлте асăннă пĕрлешÿсемпе хуçалăхсенчи тата Янкасри ветеринари участокĕнчи техник-осеменаторсем хутшăнчĕç. Вĕсем хушшинче çак ĕçре пуян опыт пухнисем тата çамрăксем те пулчĕç. Елена Егоровапа ("Караево") Фаина Васильеванах ("Красное Сормово") илер. Вĕсем чĕрĕк ĕмĕр е унран та ытларах çул тухăçлă вăй хураççĕ.
Техник-осеменаторсем ĕнесене искусственнăй майпа пĕтĕлентермелли технологине еплерех пăхăннине кăтартрĕç. Çавна выльăх-чĕрлĕх чирĕсемпе кĕрешекен районти станцири Е. Амурина ветврач ертсе пыракан жюри çирĕп тĕрĕслерĕ, никама та çăмăллăх памарĕ, кăшт йăнăш тунине те асăрхаса хак пама тăрăшрĕ. Теорире те çаплах пулчĕ. Çĕнтерÿçĕн техник-осеменаторсен çитес вăхăтра республикăра иртекен конкурсĕнче район чысне хÿтĕлеме тивет. Елена Захаровнапа Фаина Васильева хальхинче те çамрăксемшĕн ырă тĕслĕх пулса тăчĕç. Асăннă конкурсра вара "Караево" пĕрлешÿри Елена Захаровна Егорова 91 балл пухса мала тухрĕ. Иккĕмĕшпе виççĕмĕш вырăнсенче — Ф. В. Васильевапа ("Красное Сормово", 83 балл) Елена Алексеевна Константинова ("Янмурзино", 80 балл).
Источник: "Ял пурнăçĕ" (Красноармейская районная газета)