Публикации » “Шатьма” ака планне тултарнă

Апрелĕн 22-мĕшĕнче патшалăх технадзорĕн республикăри управленийĕн начальникĕ В. Димитриевпа “Агро-инновации” предприяти директорĕ Н. Васильев (вĕсем пирĕн район кураторĕсем) “Караевопа” “Нива” хуçалăхсен тата “Шатьма” пĕрлешÿ уй-хирĕсене çитсе курчĕç, вĕсенчи лару-тăрупа паллашрĕç. Карайсем палăртнă гектарсен çуррине акнă. Кунта анчахрах туяннă урапаллă çĕнĕ тракторсем валли сарлакан илекен культиваторсем ăсталанипе интересленсе паллашрĕç вĕсем. “Шатьмара” ака планне пурнăçланă. Халĕ унччен сухаламан лаптăксене хуратса шуратассипе тимлетчĕç. Пĕтĕмĕшле илсен, Шупашкартан килнисем лару-тăрупа кăмăллă пулни çинчен пĕлтерчĕç. Кунпа пĕрлех “Караевора” С. Степановăн ака агрегачĕ çинчи кăлтăксене кăтартса хăварчĕç. “Гигант” тата “Досаево” хуçалăхсем те тĕш тырăсем акассине вĕçленĕ.