04 декабря 2012 г.
Ноябрĕн 29-мĕшĕнче районти “Ял пурнăçĕ” хаçатăн Кĕçĕн Шетмĕ, Яманак, Мăн Шетмĕ çыхăну уйрăмĕсенчи, “Красное Сормово”, “Волит” хуçалăхсенчи кунĕсем иртрĕç.
Малтанах Кĕçĕн Шетмĕ çыхăну уйрăмĕнче пултăмăр. Унăн начальникĕпе Т. Антоновапа, кунти З. Яковлева, Э. Константинова почтальонсемпе тĕл пултăмăр.
Сăлтавĕ — савăнтараканни. 2012 çулхи иккĕмĕш çур çулĕн кăтартăвĕсемпе çыхăну уйрăмĕ те, асăннă почтальонсем те редакцин хавхалантару условийĕсене пурнăçланă. Ку тапхăр валли район хыпарçине 112 е çирĕплетнĕ кашни 100 кил пуçне 38, 35 экземпляр сарнă. Зинаида Николаевнан вăл кăтартусем 40 тата 42, 5 экземпляр, Эльвира Валентиновнан — 80 тата 42 экземпляр. Çакăншăн райхаçат редакторĕ И. Прокопьев кĕçĕншетмĕсене дипломсемпе тата хаклă парнесемпе чысларĕ, ку çырăнтару тапхăрĕнче те ăнăçлă ĕçлеме ырлăх-сывлăх сунчĕ. Хаçатçăсем юрă пултăр парне тенине те асра тытаççĕ. Малтисен ячĕпе баян сассипе халăхăн “Шăпчăксем” юрри янăрарĕ.
Иккĕмĕш чарăну — “Красное Сормово” ООО кантурĕ. Пирĕн телее, хуçалăхăн генеральнăй тата ĕç тăвакан директорĕсем Т. Иванова, С. Иванов вырăнтахчĕ. Специалистсемпе бухгалтери йышĕ те кунтахчĕ. Хуçалăх ĕнтĕ темиçе тапхăр хăйĕн ĕçченĕсене укçа уйăрса райхаçата çырăнма пулăшать. Иван Афанасьевич Святослав Петровича ăшшăн тав туса дипломпа хаклă парне пачĕ. Яманаксен ячĕпе те çепĕç юрă шăранчĕ.
Яманакри çыхăну уйрăмĕнчен те çын татăлмасть. Эпир килессе пĕлнĕ пекех, çыхăну уйрăмĕн клиентсене йышăнмалли пÿлĕмĕ çынсемпе тулнăччĕ. Кăçалхи иккĕмĕш çур çулхи кăтартусемпе çыхăну уйрăмĕн ( 95 е кашни 100 кил пуçне 30, 44 экземпляр) начальникне М. Михайлована тата Л. Суворова почтальонкăна (57 е кашни 100 кил пуçне 35 экземпляр) дипломсем тата хаклă парнесем патăмăр. Юрăсемпе саламларăмăр. Ял çыннисем вĕсене хапăл пулчĕç. Малашне те килсе çÿреме ыйтрĕç.
Тĕп тĕл пулусем вара Мăн Шетмĕ çыхăну уйрăмĕпе “Волит” пĕрлешÿре иртрĕç. Çыхăну уйрăмĕ ялти медицина учрежденийĕн çуртĕнче вырăн тупнă хыççăн аван условисене лекрĕ: пÿлĕмсенче çутă, таса, ăшă, хăтлă. Ĕçлекенĕсем вара чăн-чăн хастарсем. Çыхăну уйрăмĕ райхаçата валеçессипе (230 е кашни 100 кил пуçне 38, 39 экземпляр) районта пĕрремĕш вырăнта (Елена Александровна начальник каланă тăрăх хаçат-журнал сарассипе мăншетмĕсем пĕтĕм Çĕрпÿ çыхăну уйрăмĕпех пĕрремĕш вырăнта, Ю. Максимова вара Раççей пĕлтерĕшлĕ наградăпа парнене тивĕçнĕ). Юлия Александровна — райхаçата сарассипе чи лайăх почтальонка (54 е кашни 100 кил пуçне 45, 3 экземпляр), çавăншăн Иван Афанасьевич унăн хулпуççийĕ урлă “Почтальон-2012” хĕрлĕ хăю çыхрĕ, дипломпа тата хаклă парнепе чысларĕ. Дипломсемпе хаклă парнесене Е. Аленцева начальник, М. Герасимова (59 е кашни 100 кил пуçне 41 экземпляр), А. Димитриева (58 тата 40, 97), Г. Никитина тивĕçрĕç. Тĕп редакторпа хаçат тусĕ Гурий Егорович çыхăну уйрăмне пухăннисене чылай юрăпа савăнтарчĕç.
“Волит” ООО кантурĕнче те Хаçат кунĕ ăшă лару-тăрура иртрĕ. Хăтлă пÿлĕме кунти мĕн пур специалистсем пуçтарăннă. Тамара Георгиевна генеральнăй директорпа Валерий Иванович ĕç тăвакан директор та кунтахчĕ. Пуçлăхсем хаçат-журнал çырăнтарма çулсеренех укçа-тенкĕ уйăраççĕ. Çапла майпа халĕ районти “Ял пурнăçĕ” кăна хуçалăх ĕçченĕсем патне 15 экземпляр килсе тăрать. Çитес çур çул илмешкĕн ăна 17 экземпляр ведомость хатĕрленĕ. Иван Афанасьевич Валерий Ивановича асăнмалăх парне пачĕ. Хавас юрăсем çине-çинех шăранчĕç. Кăмăллă калаçу чылайччен тăсăлчĕ...
Источник: "Ял пурнăçĕ" (Красноармейская районная газета)