01 августа 2007 г.
Шурутри çыхăну уйрăмне чăннипех те лайăххисен шутне кĕртмелле. Ултă çынлă коллектива Султания Галиуллова ертсе пырать. Вĕсем кунти пилĕк яла почта çыхăнăвĕпе тивĕçтереççĕ, ял çыннисене тĕрлĕ пулăшу параççĕ. Асăннă ял поселени-йĕнче пурĕ 589 пенсионер уйăхсерен 1212 пин тенкĕ пенси укçи илет. Валентина Трескина, Алевтина Лебедева, Гельсириян Гайняллова, Любовь Анисимова, Алина Иванова почтальонкăсене халăх кунсерен чăтăмсăррăн кĕтет. Вĕсем Шурут, Шурут-Нурăс, Тутар Шуручĕ, Йỹç Шăхаль, Юнтапа ял çыннисене çыру, хаçат-журналпа вăхăтра тивĕçтерме тăрăшаççĕ. Çыхăну уйрăмĕ хăйĕн умне лартнă тĕллевсене çулсеренех туллин пурнăçласа пырать, халăх ыйтăвĕсене пысăк пахалăхпа татса парать, ялта пурăнакансене тĕрлĕ пулăшу парасси çине тивĕçлĕ тимлĕх уйăрать. Унта ĕçлекенсемпе халăх кăмăллă. Вĕсен сăпайлăхĕ, ырă кăмăлĕ, çынсемпе пĕр чĕлхе тупма пĕлни ĕçре курăмлă çитĕнỹсем тума пулăшать те. Почта уйрăмĕнче тĕрлĕ открытка, хаçат-журнал выставки йĕркеленĕ. Халăха куллен кирлĕ таварсем те сутаççĕ кунта. Почтальонкăсем ĕçре кăна мар, тĕрлĕ мероприятисенче те маттур.
Источник: "Каçал Ен"