08 августа 2015 г.
"Урожай" колхоз пуçаруллă та маттур ĕçленине хаçат вуланă тăрăх пĕлнĕ-ха эпĕ. Çак енннелле кайса курма вара мана пĕрремĕш хут тỹр килчĕ. Çăмăл машина пире Шурут ялне вăр-вар илсе çитерчĕ. Хирĕç вашават та сулмаклă утăпа утакан арçын колхоз агрономĕ В.Ф.Денисов пулчĕ иккен. Эпир Шурутсен уй-хирти çак кунхи ĕçĕсемпе кăсăкланнине пĕлсен вăл паллаштарма хапăлласах килĕшрĕ. Утă çинче ĕçлекенсем патне çул тытрăмăр. Машина кантăкĕнчен пăхса пынă май ылтăн тинĕс пек сарăлса выртакан тырă анисем чуна савăнтарчĕç. Кунта пĕр çумкурăк та кураймăн.
Эпир çитнĕ вăхăтра ĕçченсем шăпах пĕр ана çинчи юлашки утă рулонĕсене тиесе тухрĕç. А.Миллин, Н.Евсеев, А.Мунтайкин, Е.Мушарапов водительсем шанса панă транспортпа ялпа уй хушшинчи çула умлăн-хыçлăн тулли машинăпа такăрлаççĕ. А.Миллин ирпе-ирех, хире КамАЗпа тухиччен, колхоз ферминче сунă тата халăхран пуçтарнă сĕте Çĕнĕ Кипеçри завода леçсе ĕлкĕрет.
Василий Федорович хыççăн эпир нумай çул ỹсекен курăксен çулса типĕтнĕ тепĕр ана çине васкарăмăр. Кунта виçĕ трактор утă кассисен йĕркипе анан пĕр пуçĕнчен тепĕр пуçне чупать. Утта хускатса тавăракан тракторпа П.Степанов ĕçлет. Унăн кустăрми йĕррипе утă преслакан икĕ тракторпа В.Мунтайкинпа Ю.Уразаев енчен-енне кумаççĕ. Ỹркенмен В.Мунтайкин тракторист вара вырмара комбайнпа та ĕçлесе ĕлкĕрет. Вĕсем хыççăн ларса юлакан утă рулонĕсене тиекен тракторпа пирĕн хыççăнах çитнĕ П.Степанов турттаракан транспорт патне васкать.
Çуллахи кунсемпе туллин усă курмасан хĕле ирттерме йывăртарах пуласса Шурутсем лайăх ăнланаççĕ. Çавăнпа та механизаторсем уй-хире ир-ирех тухса каç пулса куç курми пуличченех тăрăшаççĕ.
Çурла уйăхĕн 7-мĕшĕ тĕлне Шурутсем 302 гектар çинчен 760 тонна кĕрхи тулă çапса илсе, йĕтемре алласа вырнаçтарнă та ĕнтĕ. 3625 тонна сенаж, çав шутран 1082 тонни - пĕрчĕллĕ тата пăрçа йышши культурăсенчен, хатĕрленĕ. 550 тонна утă янтăланă.
"Урожай" колхозра кăтартусемшĕн çеç мар, ĕçе тивĕçлĕ, пахалăхлă пурнăçлассишĕн вăй хураççĕ. Колхоз Ульяновск облаçĕнчи наукăпа тĕпчев институтĕнчен çурхи туллăн "Симбирцид" сортне 5 тонна туяннă, тухăç аван тухасса шанаççĕ. Çавăн пекех вĕсем пăрçан "Юбилейный" çĕнĕ сортне туянса акнă.
Паллах, ĕç тухăçлăхĕ ертỹçĕсен пултарулăхĕнчен, халăха ĕçлеттерме пĕлнинчен нумай килет. Ĕне усракан кашни хуçалăха колхоз рынокринчен çур хак йỹнĕрех утă сутнă, ĕç кунĕсен минимумне тултарнисем хăй хакĕпе тырăллă тата утăллă пулĕç, хирте ĕçлекен механизаторсене вара тỹлевсĕр утă валеçĕç.
- Ир тăракан кайăк тутă пулнă. Хамăра тăрантаракан çĕре хисеплесе, технологисене пăхăнса, пĕр-пĕринпе килĕштерсе, ĕçе юратса тăрăшсан ĕç ăнатех, - тет Василий Федорович Денисов.
С.ЕФИМОВА
Источник: "Каçал Ен"