06 сентября 2014 г.
Украина çĕрĕнчи лăпкă мар лару-тăрăва пула пирĕн республикăна куçса килекен те йышлă. Çемйисене тытса тăрас тесе вĕсем кунта ĕçе те вырнаçаççĕ. Куçса килнисене ĕçпе тивĕçтерекен центр та нумай пулăшать. Центр ĕçченĕсем çак тĕллевпе тĕрлĕ организаци-предприятисемпе, уйрăм предпринимательсемпе çыхăнса ĕçлеççĕ, вакантлă вырăнсене ĕç шыракансене сĕнеççĕ.
Комсомольскинчи ĕçпе тивĕçтерекен службăпа Ирçе Çармăс лесничествин вăрман арендаторĕ З.Н.Истратий те тачă çыхăну тытать, мĕншĕн тесен кунта яланах трактористсем, вăрман касакансем валли çулталăк тăршшĕпех ĕç пур. З.Н. Истратий уйрăм предприниматель 6048 гектар вăрмана арендăна илнĕ. Темиçе çул ĕнтĕ вăл тата вăрман ĕçченĕсем йывăç лартас, сиплес тата ăна чирлĕ, хăрнă йывăçсенчен тасатас, пăхса тăрас енĕпе ĕçлеççĕ. Паллах, çак ĕçсене ятарлă техникăсăр пурнăçлама çук.
Çĕнĕ Мăратри вăрман участокĕнче моторист кирлине шăпах çак служба урлă пĕлнĕ те ĕнтĕ маларах Донецк облаçĕнче пурăннă Владимир Геллер. Çемье пуçĕ валли ĕç тупăнсан пилĕк çынран тăракан çемье пирĕн тăрăха куçса килме килĕшнĕ. Вĕсем валли Шурут ялĕнче вăхăтлăх пурăнмалли çурт та тупăннă. Ăна Леонид Николаевич Петров панă, хăй Мускавра пурăнать. Мăшăрĕ Наталья, Эрнест ывăлĕ, Елена хĕрĕпе мăнукĕ Кирилл кунтах юлма та хирĕç мар. Вĕсем куçса килнĕ çынсен статусне илмелли документсене çийĕнчех туса панăшăн районти тĕрлĕ службăсен ĕçченĕсене пĕтĕм кăмăлтан тав тăваççĕ.
Паянхи кун Владимир Геллер вăрман касаканра ĕçлет. З.Н. Истратий вăл тăрăшуллă та пуçаруллă пулнине палăртать. Ытти ĕçченсемпе пĕр чĕлхе тупма та нумай вăхăт кирлĕ пулман арçынна.
Источник: "Каçал Ен"