16 августа 2014 г.
Паянхи кун районти ял хуçалăх предприятийĕсенче вырма ĕçĕсем хĕрсе пыраççĕ. Çак кунсенче Шурут тăрăхĕнчи икĕ хуçалăха çитсе ĕç çи епле аталаннипе паллашрăмăр. "Урожай" колхозпа "Победа" кооператив, маларах пĕр колхоза кĕнĕскерсем, кỹршĕллĕ вырнаçнă. Вĕсен тĕп пуянлăхĕ - хастар та ĕçчен çыннисем. Çавсен тăрăшулăхĕпе уй-хирте тыр-пул çитĕнет, пỹлмене кĕрет, фермăсенче выльăх-чĕрлĕх ĕрчет тата ытти те.
"Урожай" колхозăн тĕп агрономĕпе Василий Денисовпа сĕлĕ уйне çитсе куртăмăр. Кунта ял хуçалăх техникин ĕçлĕ шăв-шавĕ тăрать. Комбайнсем сĕлĕ ани тăрăх мăнаçлăн шăваççĕ, груз турттаракан машинăсем "хир - йĕтем" маршрутпа калла-малла хутлаççĕ.
- Кăçал пирĕн 1258 гектар çинчен пĕрчĕллĕ тата пăрçа йышши тырăсене пуçтарса илмелле. Августăн 13-мĕшĕ тĕлне 1524 тонна тырă йĕтемсене, пỹлмесене кĕнĕ ĕнтĕ. Вăтам тухăç 31,5 центнерпа танлашать. Комбайнерсем питĕ тăрăшуллă ĕçлеççĕ, водительсемпе механизаторсем, йĕтем çинчисем те хастар, - паллаштарчĕ хăйсен ĕç-хĕлĕпе Василий Федорович.
Пĕр комбайн патĕнчен теприн патне çитрĕмĕр. Акă, "Палессе-12" комбайнăн бункерĕ тулчĕ те вăл çитсе ларнă автомашина çине тырра куçарма чарăнчĕ. Геннадий Шакмаковпа Анатолий Коновалов экипажĕ пулчĕ ку. Бункер пушансанах вĕсем малалла вырма васкарĕç. "Вектор" комбайн штурвалĕ умне вара кăçалхи вырмара Анатолий Гаврилов ларнă. Пенси çулне çитнĕ пулин те, сывлăхĕ пур чухне хĕрỹ ĕççи вăхăтĕнче тăван колхоза пулăшма хирĕç мар вăл. Владимир Иванов пулăшаканĕпе иккĕшĕ пĕр минута та сая ярасшăн мар. Виççĕмĕш экипажра - "Дон-1500" комбайнпа ĕçлекен Владимир Мунтайкинпа Владислав Мышкин.
Сĕлĕ хăмăлне çỹллĕрех хăвараççĕ комбайнсем, улăмне вара вĕтĕ вакласа сапалаççĕ.
- Аяла люцерна акнипе çапла тăватпăр. Хăмăл вăрăмрах юлсан нумай çул ỹсекен курăксене хĕлле хỹтĕ пулĕ, улăма вакласа пăрахни вара çĕре пулăхлатма пулăшать, - ăнлантарчĕ В.Денисов.
Тырра йĕтемсем çине Тагир Сейфуллов, пĕр тăван Анатолипе Геннадий Каторгинсем турттараççĕ. Илья Аюков, Александр Тарасов тата Сергей Энне, Валерий Комаров, Николай Пыркин, Владимир Спиридонов механизаторсем кĕрхи культурăсене акма çĕр хатĕрлеççĕ, çĕртме тăваççĕ. Улăмне те çийĕнчех пуçтарса пыраççĕ. Кашнин пирки ырă сăмах çеç каларĕ тĕп агроном, ĕçченлĕхшĕн мухтарĕ. Чăннипе, паян ял хуçалăхĕ çавăн пек маттур арçынсем çинче тытăнса тăрать те ĕнтĕ.
"Победа" кооперативра вара йĕтем çине çул тытрăмăр. Ĕçченсем тырă аллакан агрегатсем патĕнче ĕçлетчĕç. Вăрлăхлăх викăна, сĕлле, кĕрхи тулла çапса тĕшĕлеме ĕлкĕрнĕ хуçалăхра. Вĕсен тухăçĕ те аван иккен, гектартан вика 37, сĕлĕ 39 центнер илнĕ. Александр Трескинпа Владимир Тарасов "Дон-1500", Александр Шуряшкинпа Георгий Федоров СК-5 "Нива" комбайнсемпе тырра çапса тĕшĕлеççĕ. Тасатнă тырра кĕлетсене кĕртсех пыраççĕ.
Йĕтем заведующийĕ Валентина Краснова каланă тăрăх, куллен 16 çын тăрăшать кунта, пурин валли те ĕç çителĕклĕ. Валерий Фомин машинист тырра аллакан-сăвăракан машинăсен тикĕс те кал-кал ĕçĕшĕн яваплă.
- Кĕркунне акса хăварма 60 тонна ытла вăрлăх хатĕрленĕ. Çĕрпỹри опытлă участокран "Безенчугская-380" сортлă элита тулă вăрлăхĕ кỹрсе килĕпĕр. Николай Шагаров, Владислав Андреев механизаторсем кĕрхисем валли çĕр сухаласа хатĕрленĕ, палăртнă вăхăтран кая юлмасăр сеялкăсем хире тухĕç, - терĕ кооперативăн тĕп агрономĕ Сергей Кузьмин. Александр Еремеев улăма пресланă çĕрте тăрăшать.
Çĕр ĕçченĕсене ĕç çи вăхăтĕнче Галина Курбатинапа Людмила Леонтьева поварсем вĕри апатпа тивĕçтереççĕ. Аппăшĕпе йăмăкĕ вăр-вар та çаврăнăçуллă, çавăнпах столовăйне килнисене те апатлантарма ĕлкĕреççĕ, хире те комбайнерсемпе трактористсем патне çитсе килеççĕ.
Мĕн пур ĕçĕн хăйĕн вăхăчĕ пур. Кашни самантпа туллин усă курса пĕрчĕллĕ тата пăрçа йышши культурăсене кая юлмасăр пухса кĕртессишĕн "Урожай" тата "Победа" хуçалăхсен ĕçченĕсем ырми-канми тăрăшаççĕ. Ара, вырмана вĕçлесен тата тымар çимĕçсене тирпейлесе кĕртмелле. Фермăсенчи выльăх-чĕрлĕх те хĕл кунĕсенче тутă пулмалла, çавăнпа вĕсем валли апат хатĕрлес ĕç те хура кĕрчченех пырать. Çавăнпа пĕрлех, ял хуçалăх предприятийĕсенче тăрăшакансене çителĕклĕ таран утă-улăмпа тивĕçтереççĕ, тырă валеçме тытăнасшăн. Тулăх пурăнмашкăн ял çыннине урăх мĕн кирлĕ?
Палăртнă ĕçĕсене вăхăтра пурнăçлама Шурутсемпе Йỹç Шăхальсене çирĕп вăй-хал тата ăнăçу сунас килет. Пỹлмĕрсемпе енчĕкĕрсем тулли, выльăхăрсем тутă, хăвăр сывлăхлă пулăр!
Источник: "Каçал Ен"