26 марта 2014 г.
Черет çитнĕ май, район юбилейне халалланă смотр-конкурса мартăн 21-мĕшĕнче Шурут ял поселенийĕ малалла тăсрĕ. Пирваях ял тăрăхĕн пуçлăхĕн ĕçĕсене вăхăтлăха пурнăçлакан Елена Козлова хăйсен ĕç-хĕлĕпе паллаштарчĕ. Вăрăмах мар отчетĕнче Елена Ивановна пилĕк ялти халăхăн пурнăçне çутатса пачĕ, паллă çыннисем çинчен каласа хăварчĕ, малашнехи тĕллевĕсем çинче чарăнса тăчĕ. Шурутсем концерт программине тăван тăрăх çинчен хор шăрантарнă юрăсемпе уçрĕç. Ун хыççăн сцена çине пĕрин хыççăн тепри вăтам шкулăн, пĕтĕмĕшле практика врачĕн офисĕн коллективĕсем тухрĕç. Шкул ачисем те хаваслă ташăсемпе савăнтарчĕç. "Шăхаль" фольклор ушкăнĕ куракансене чăваш халăх юррисене парнелерĕ. Уйрăм юрăçсене те залра ларакансем хапăлласах йышăнчĕç, алă çупса хавхалантарчĕç. Комсомольски районĕн 75 çулхи юбилейне тата Республика кунне халалланă смотр-конкурс майăн 8-мĕшĕчченех пырать. Апрелĕн 4-мĕшĕнче ăна Комсомольски ял тăрăхĕ малалла тăсĕ. Яланхиллех, концерт район центрĕнчи культурăпа кану центрĕнче 18.30 сехетре пуçланать, çитсе курма тăрăшăр.
Л.ШУРЯШКИНА
Источник: "Каçал Ен"