06 июля 2013 г.
Нумаях пулмасть регионсем хушшинчи «Регионсем — чикĕсĕр ĕçтешлĕх» ХХ куравра пирĕн районти «Урожай» колхоз председательне А.Н.Ершова РФ Пенси фончĕн правленийĕн председателĕ Антон Дроздов алă пуснă дипломпа чысланă. «Урожай» колхоз 2012 çулхи кăтартусем тăрăх «100 — 500 ĕçлекенлĕ чи лайăх страхлакан» номинацире çĕнтерÿçĕ пулса тăнă.
Пĕтĕм Раççейри «Чи лайăх страхлакан» конкурс 4-мĕш хут иртет. Унăн тĕллевĕ — ĕç паракансене социаллă яваплăх çинчен аса илтересси. Çĕнтерÿçĕсене палăртнă чухне çак енсене шута илеççĕ: медицина тата пенси страхлавĕ валли укçа-тенке вăхăтра тата туллин куçарни, çĕнĕ йышши электрон технологийĕсемпе усă курса хатĕрленĕ отчетсене тăратни, патшалăх пенси софинансированийĕн программине хутшăнакан сотрудниксене пулăшу кÿни. Çак условисене республикăри чылай организаци тивĕçтерет. Вĕсенчен 16-шĕ кăçал çĕнтерÿçĕсен шутне кĕнĕ.
Уявра Чăваш Ен Пуçлăхĕ Михаил Игнатьев РФ Пенси фончĕн павильонĕ çине уйрăм тимлĕх уйăрнă. Çавăн пекех вăл куравра паллаштарнă çивĕч ыйтусемпе, аслă ăру çыннисем тата ĕçлекен граждансем пенси фончĕн информаци базипе паллашма пултарнипе интересленнĕ. М.Игнатьев пенси фондĕнче тăрăшакансем хăйсен ĕçне çÿллĕ шайра пурнăçласа пынине палăртнă.
РФ Пенси фончĕн Комсомольски районĕнчи управленийĕ.
Источник: "Каçал Ен"