29 мая 2013 г.
Майăн 25-мĕшĕнче Йÿç Шăхаль ялĕнчи культура çуртĕнче пысăк мероприяти иртрĕ. Чи малтанах районти пушар надзор уйрăмĕн начальникĕ Николай Назаров пушар хăрушсăрлăхĕ çинчен лекци вуларĕ. Ун хыççăн Шурут ял тăрăхĕн пуçлăхĕн ĕçĕсене тăваканĕ Елена Козлова та сăмах илчĕ. Вăл пухăннисене пурăнакан çурт умĕсене, масарсене çÿп-çапран тасатма чĕнсе каларĕ.
Каярахпа Раççейри Чрезвычайлă лару-тăру министерствин Чăваш Республикинчи управленийĕ çумĕнчи «Çулăм» ансамбль «Верность присяге» юрăпа концерт программине пуçларĕ. Сăмах май, юррăн кĕввипе сăмахĕсем — Чăваш Республикин культура тава тивĕçлĕ ĕçченĕн Георгий Фадеевăн. Вăлах ансамбль ертÿçи те.
Тĕп хуламăртан килнĕ артистсем ял халăхне «Жемчужина России», «Маленький дружок», «Каçарсам» тата ытти юрăсемпе савăк кăмăл парнелерĕç.
Чăваш Республикин Писательсен союзĕн правленийĕн членĕ Георгий Фадеев (Хавал) хăй çырнă «Пушар салтакĕ» балладăна вуланă хыççăн чылайăшĕн куçĕсем шывланчĕç.
Йÿç Шăхалĕнче çуралса ÿснĕ Лидия Васильевна Шмелева, Раççейри Чрезвычайлă лару-тăру министерствин смотр лауреачĕ, зала пухăннисене илемлĕ сассипе тыткăнларĕ. Концерта килнисем артистсене тав туса чылайччен алă çупрĕç.
Пухăннисем килĕсене савăк кăмăлпа саланчĕç.
М.ИЛЛАРИОНОВА