30 апреля 2013 г.
Кăçал ăна «Победа» ЯХПК ĕçченĕсем тĕплĕн кĕтсе илнĕ. Тракторсем валли дизель топливи, автомашинăсем валли бензин çителĕклĕ хатĕрлесе хунă. Механизаторсем те хăйсене шанса панă техникăна юсанă.
Ял хуçалăх кооперативĕн ертÿçи Константин Лепешкин çуркуннене чи канăçсăр тапхăрсенчен пĕри тесе шутлать. Сăмах май, вăл паянхи кун районта ял хуçалăх производство кооперативĕсен чи çамрăк ертÿçисенчен пĕри. «Пахалăхлă, вăхăтра акса ĕлкĕрнинчен ыранхи пурнăç тулăхĕ, тырă-пулă ăнса пуласси нумай килет», — терĕ председатель.
Акана апрелĕн 18-мĕшĕнче пикеннĕ вĕсем. Уяр çанталăкпа туллин усă курасшăн «Победăсем». Акă, паянхи кун вĕсем уй-хирти çурхи ĕçсене пурнăçлаççĕ.
Ĕçченсем хирсенче 130 гектар тулă, 70 гектар вика, пĕрчĕллĕ тата пăрçа йышши ытти культурăсене акнă.
«Тĕш-тырă ăнса пуласси вăрлăх пахалăхлă пулнинчен, удобренисемпе тĕрĕс усă курнинчен, агротехника ĕçне вăхăтра пурнăçланинчен килет. Ахальтен мар ĕнтĕ Çĕрпÿри опытлă станцинчен 28 тонна, «Слава картофелю» агрофирмăран 32 тонна çĕр улмин элита вăрлăхне туянтăмăр», — тет уй-хирти ĕçсемпе паллаштарса тĕп агроном Сергей Кузьмин.
Чăннипех çур акинче çанă тавăрса ĕçлеççĕ Йÿçшăхальсемпе Юнтапасем. Унта кашни кун 10 çын ытла тухать. Уйрăмах Константин Шмелев, Андрей Иванов сеяльщиксем, Василий Федоров водитель, Виталий Шагаров, Александр Еремеев, Геннадий Еремеев трактористсем пултаруллă. Тăпрана катокпа пусарнă
çĕрте те ĕç хĕрÿ пырать. Ăна пахалăхлă пурнăçлас тесе Сергей Носков тăрăшать. Елена Архипова, Раиса Кондратьева, Елена Иванова, Галина Милованова, Мария Яковлева тата Сергей Данилов вăрлăха им-çамлаççĕ.
Çитес кунсенче «иккĕмĕш çăкăра» лартма тухасшăн.
Хуçалăх хирĕсенче паян чарăнми ĕç пырать. Çак яваплă тапхăр вĕçленнĕ хыççăн тăрăшуллă ĕçченсене тата ытти ĕçсем те кĕтеççĕ.
М.ИЛЛАРИОНОВА
Источник: "Каçал Ен"