Публикации » Туслă çемье ялта хисепре

Çемье, юратупа шанчăклăх кунĕнче тĕслĕхлĕ мăшăрсене чысласси хăйне евĕр йăла пулса тăнă ĕнтĕ. Кăçал та республикăри 21 мăшăра çемье институтне çирĕплетме пысăк тÿпе хывнăшăн «Юратупа шанчăклăхшăн» орден панă. Вĕсем хушшинче пирĕн районти Йÿç Шăхаль ялĕнче пурăнакан Павловсем те пур.

63 çул пурнăç сукмакне алла-аллăн утса такăрлатакан София Петровнăпа Григорий Федоровича орден парса саламлама ЧР Патшалăх Канашĕн депутачĕ Петр Краснов, район администрацийĕн ял хуçалăх тата экологи пайĕн начальникĕ Илдус Миннетуллин, Шурут ял поселени пуçлăхĕ Татьяна Козлова, Йÿç Шăхаль пуçламăш шкул директорĕ Мария Всеволодова килсе çитрĕç. Вĕсем мăшăра саламласа чылай ăшă сăмах каларĕç, «Юратупа шанчăклăхшăн» ордена парса чысларĕç, парнесемпе савăнтарчĕç. Павловсем вĕрентнĕ ачасем вĕсене тав турĕç, вĕсем чăннипех те тĕслĕхлĕ мăшăр пулнине çирĕплетрĕç. София Петровнăпа Григорий Федорович ялти ятлă, хисеплĕ çынсем. Иккĕшĕ те чылай çул учительте ĕçлесе тивĕçлĕ канăва тухнă.

Г.Павлов малтан Улатăрти педагогика училищинче ăс пухнă. 1941 çулта Йÿç Шăхальти 7 класлă шкулта кĕçĕн классене вĕрентме пикеннĕ. Нумаях та ĕçлеймен, вăрçа тухса кайнă. Унтан таврăнсан татах юратнă ĕçĕнче вăй хунă. Пĕлĕвне çирĕплетес тĕллевпе Чăваш педагогика институтне вĕренме кĕнĕ, вырăс чĕлхипе литературин учителĕ пулса тăнă. «Ачасемпе чуна парса ĕçленĕ, хамăн предметпа кăсăклантарма, кашни ыйту çине хурав тупма тăрăшнă. Учитель ятне çÿлте тытнă»,— пĕлтерет Григорий Федорович.

Пĕтĕмĕшле педагогика стажĕ унăн 35 çулпа танлашать. Нумай çул вĕренÿ сферинче вăй хунăшăн, ачасене ăс парас ĕçре пысăк çитĕнÿсем тунăшăн ăна ЧР Вĕренÿ тата çамрăксен политикин министерствин Тав хучĕпе чысланă.

София Петровна та пурнăçне çамрăклах педагогикăпа çыхăнтарнă. Вăл Чăваш патшалăх педагогика институтĕнче вĕреннĕ, чăваш чĕлхипе литературин учителĕ пулнă. 1942—1945 çулсенче Йÿç Шăхаль шкулĕн директорĕнче, 1954 çулччен — директорăн вĕренÿ енĕпе яваплă çумĕнче вăй хунă. 40 çул шкул сукмакне такăрлатнă София Петровна. Уроксене вĕрентнипе çеç мар, класс тулашĕнчи ĕçе йĕркелес тесе те нумай тăрăшнă вăл. Хăй те сăвăсем çырма кăмăллакан учитель шкулта литература кружокĕ уçнă. Унта çÿресе ачасем илемлĕ литературăна туйма вĕреннĕ, хайлавсем çырас ăсталăхне аталантарнă. «София Петровна шкул ачисене интереслентерме пĕлетчĕ. Ялан темĕскер çĕнни шутласа кăларатчĕ, конкурссем ирттеретчĕ. Сăвăсене питĕ илемлĕ вулатчĕ, пире те çавăн пек вулама хăнăхтаратчĕ»,— халĕ те аса илеççĕ унăн вĕренекенĕсем. Унсăр пуçне вăл районăн обществăлла пурнăçне хутшăнма та яланах вăхăт тупнă. Час-часах ăна ял Совечĕн депутатне, районти халăх сучĕн заседательне суйланă. Ялти клубра çырăнакансене те вăлах çырăнтарнă. Хастар хĕрарăма пĕрре çеç мар Хисеп грамотисемпе, Тав хучĕсемпе чысланă. Унăн ЧР Президенчĕн Тав çырăвĕ те пур.

Павловсем 60 çул ытла пĕрле пурăнаççĕ пулсан та, никам та иккĕшне харкашнине, пĕр-пĕрне ятланине илтмен. «Кăвакарчăнсем пек»,— теççĕ вĕсем пирки çывăх çыннисем.

3 ачана кун çути парнелесе çитĕнтернĕ туслă мăшăр. Вĕсене пурне те тивĕçлĕ воспитани панă, аслă пĕлÿ илме пулăшнă. Алевтина Чăваш патшалăх университетĕнче тухтăра вĕреннĕ, Шупашкарти 1-мĕш хула больницинче врач-дерматовенерологра ĕçлет. Ăна тăрăшулăхĕшĕн, ĕçченлĕхĕшĕн темиçе хут та Хисеп грамотисемпе чысланă. Геннадий Чăваш ял хуçалăх институтĕнче «зоотехник» специальноçа вĕреннĕ, нумай çул Орел облаçĕнчи агропромышленноç комплексĕнче вăй хунă. Людмила та аслă пĕлÿллĕ, чылайранпа ĕнтĕ ЧР Ял хуçалăх министерствинче финанспа кредит политикин уйрăмĕнче ĕçлет. Ăна «Чăваш Республикин ĕç ветеранĕ» хисеплĕ ятпа та наградăланă. Куратпăр ĕнтĕ: улми йывăççинчен аякка ÿкмест тени тĕрĕсе килет. Вĕреннĕ, пултаруллă çынсен ачисем те малти ретре. Çавăнпах та пулĕ ĕнтĕ Павловсен çемйине ялта çеç мар, районта та хисеплеççĕ.