Публикации » Никама та манман, нимĕн те манăçман

Ирсĕр тăшманпа çапăçнă паттăрсен ячĕсене пирĕн пĕлмелле, яланах асра тытмалла. Ытла та хака ларнă-çке совет çыннисемшĕн çак вăрçă. Вăл Тăван çĕр-шыв пуласлăхне татса панă.

Пирĕн район çичĕ пин ытла ывăлпа хĕрне фронта ăсатнă. 3680-шĕ вара тăван киле таврăнайман.

Ирсĕр тăшманпа тан мар çапăçура пуçĕсене хунă салтаксем çинчен çар архивĕсенче чылайччен «Хыпарсăр çухалнă» сведенисем упраннă. Çавăн пек паттăрсене тупса палăртас тесе Йăлмахва ялĕнче пурăнакан П.Н. Зайцев чылай ĕç тăвать. Паянхи куна вăл Аслă Отечественнăй вăрçăра пуçĕсене хунă 132 салтак шăпине тупса палăртнă. Çав шутран 58 хĕрлĕ армеец хыпарсăр çухалнă, тĕрлĕрен йывăр шăпаллисене 12 (суд тенкелĕ çине ларнă, таркăн) тупса палăртнă. Чăннипех те пархатарлă ĕç тăвать Павел Николаевич.

Акă вăл Йÿç Шăхалĕнче 1910 çулта кун çути курнă, Первомайски районĕнчи çар комиссариачĕ урлă вăрçа тухса кайнă, 1943 çулта хыпарсăр çухалнă Сергей Степанович Никитин рядовой шăпине нумаях пулмасть уçса пачĕ. Пирĕн ентеш Вадински партизан бригадинче, 207001 номерлĕ çар чаçĕнче фашистсемпе çапăçнă. Вăл партизан отрячĕсенче тăшмансен гарнизонĕсене тата вĕсен коммуникацийĕ çине тапăннă. 1943 çулхи февралĕн 3-мĕшĕ тĕлне Мускав патне çывхаракан гитлеровецсем партизансем вырнаçнă участоксене хупăрланă, вĕсем вырнаçнă лагерьсене аркатнă.

Шартлама сивĕ тăнă, боеприпассем, апат-çимĕç пулман. Нумай çухатупа ушкăн-ушкăнпа партизансем «ункăран» тухнă. Çакăнти çапăçусенче партизансем нумай вилнĕ тата çухалнă. Пирĕн ентеш С.Никитин, Вадински вăрманĕнче (Мускав — Минск автомагистральтен çур-çĕр енче) паттăрла пуçне хунă.