Публикации » Йывăрлăхсем умĕнче пуç усма хăнăхман

Эпир пынă чухне «Урожай» колхозăн кĕлечĕсем патĕнче çынсем хĕвĕшетчĕç. Хуçалăх колхозниксене ĕç кунĕ тăрăх тырă валеçет иккен. Кăçалхи çулшăн колхоз япăх мар тухăç илнĕ. Ял çыннисем тулли михĕсене трактор çине тиетчĕç. Ĕçленине кура аванах тырă лекет. Пĕлетпĕр ĕнтĕ, «Урожай» колхоз кăçал районта уй-хир культурисенчен чи пысăк тухăç илнĕ, куçса çÿрекен «Ылтăн пучах» приза тивĕçнĕ. Бригадăсен кăтартăвĕсем те лайăх. Г.Галиуллова бригади апат единици çине куçарсан кашни гектартан 22,5 центнер, С.Улжусеван 16,2 центнер уй-хир культурисем туса илнĕ. Çаксем — районта чи лайăх тухăçсем. Выльăх апачлĕх культурăсем те, çĕр улми те начар пулнă тесе калаймăн.

Хуçалăхра çитес çулхи тухăçшăн кĕркуннех хатĕрленме пуçланă. Çĕртме тăвассине вĕçленĕ.

— Вăрлăха сортласа тивĕçлĕ кондицие лартас енĕпе те тăрăшатпăр. 50 тонна урпана, 40 тонна тулла алласа, сортласа хатĕрленĕ. Ку ĕç малалла пырать. Унта халăх йышлă хутшăнать. С.Кудряшовăпа Н.Миллина ĕçе пĕлсе йĕркелесе пыраççĕ, — тет колхозăн тĕп агрономĕ В.Ф.Денисов.

«Урожай» колхоз çур акине яланах тĕплĕн хатĕрленсе çитнĕ. Кăçал йывăрлăхсем чылайрах пулма пултарĕç. Хуçалăх кăткăс лару-тăрура нихăçан та çухалса кайман. Малашне те çаплах пуласса шанас килет.