Публикации » Ентешсем Анатолий Лукиянова манмаççĕ

Кĕске ĕмĕр пурăнсах хăйсем хыççăн çутă çăлтăр пек йĕр хăваракан çынсем те пулаççĕ çĕр çинче. Çавăн пеккисенчен пĕри — Йÿç Шăхаль каччи Анатолий Лукиянов. Предпринимательччĕ вăл, «Кĕтне» ентешлĕхе ертсе пычĕ. Комсомольски районĕнче çуралса ÿснĕ, Шупашкарпа Çĕнĕ Шупашкар хулисенче пурăнаканскерсене пĕр чăмăра пухассишĕн чылай ĕç турĕ. Шел, пурнăçран ир уйрăлчĕ. Çулсем иртсен те тăван районта ăна асрах тытаççĕ. А.И.Лукиянова асăнса çулсеренех волейбол турнирĕ йĕркелеççĕ. Кăçалхипе вăл саккăрмĕш хут иртрĕ. Çĕнĕ Шупашкарти ачасемпе çамрăксен специализациллĕ Олимп резервĕсен 3-мĕш шкулĕнче спортсменсен тăватă команди тĕл пулчĕ.

Комсомольски районĕн тата Çĕнĕ Шупашкар хулин ертÿçисем Геннадий Волковпа Вениамин Артемьев, «Кĕтне» ентешлĕх председателĕ Валери Туркай, Чăваш Республикин Патшалăх Канашĕн депутачĕ Кияметдин Мифтахутдинов, Чăваш патшалăх ял хуçалăх академийĕн ректорĕ Николай Кириллов тата ытти хăнасем саламланă хыççăн вăйă пуçланчĕ. Пирваях площадкăна Комсомольски районĕпе Чăваш патшалăх ял хуçалăх академийĕн «Кубня» тата «ЧГСХА» командисем тухрĕç. Çакна каласа хăварам: ял хуçалăх академийĕн команди турнира пуçласа хутшăнчĕ. Унта вылякан каччăсем – хамăр район ачисемех. Тăваттăшĕ Шурут ялĕнчен, Нĕркеçрен те пур. Тупăшу олимп системипе иртрĕ. Вăййăн икĕ тапхăрĕнче те студентсем вăр-вартарах пулни палăрчĕ, вĕсем 2:0 шутпа комсомольскисене çĕнтерчĕç. Иккĕмĕш тĕл пулу «Нĕркеç» тата Шупашкарти ентешсен пĕрлештернĕ «Кĕтне» командисем хушшинче иртрĕ. Кунта ăнăçу малтан нĕркеçсен енче пулчĕ, пĕрремĕш тапхăрта вĕсем 25:13 шутпа выляса илчĕç. Иккĕмĕшĕнче вара ентешлĕх команди 25:17 шутпа мала тухрĕ. Виççĕмĕш тапхăр çак тавлашăва татса пачĕ: 15:4 шутпа «Нĕркеç» çĕнтерчĕ. Тăхтавсем вăхăтĕнче куракансене Виталий Адюков тата «Уяв» фольклор ансамблĕн ертÿçи Зинаида Козлова ентешĕмĕр илемлĕ юрăсем парнелерĕç.

Виççĕмĕш вырăншăн «Кубня» тата «Кĕтне» тупăшрĕç. Кунта икĕ сэтра та маттуртарах пулса ентешлĕх команди мала тухрĕ. Юлашкинчен «Нĕркеçпе» «ЧГСХА» пĕрремĕш вырăншăн вылярĕç. Ку тупăшу уйрăмах хĕрÿ пулчĕ. Пĕрре пĕрисем мала тухаççĕ, тепринче иккĕмĕшсем иртсе каяççĕ. Куракансем кăшкăрса, тăпăртатса спортсменсене хавхалантарчĕç. Çапах нĕркеçсем енне пĕрре çаврăннă ăнăçу вĕсене пăрахмарĕ, çĕнтерÿçĕ команда куçса çÿрекен кубок хуçи пулса тăчĕ. Ял хуçалăх академийĕн студенчĕсем иккĕмĕш вырăна тухрĕç.

«Республикăра тĕрлĕ районсен ентешлĕхĕсем пур. Анчах та комсомольскисем пек туслă, харсăр ĕçлекенсем сахалрах. Çакнашкал спорт мероприятийĕсем тăтăшах иртни пĕр район çыннисене паллашма, курса калаçма, ĕçлĕ çыхăнусем тĕвĕлеме те май парать-çке. «Кĕтнерен» ыттисен тĕслĕх илмелĕх пурах», — терĕ Вăрнар çынни, пирĕн ентешлĕхĕн хисеплĕ членĕ Роберт Сорокин, асăннă турнира хак парса. Чăнах та, «Кĕтне» ентешлĕх спорта аталантарас енĕпе чылай ĕç тăвать. Кăçал ял хуçалăх академийĕн студенчĕсем пуçласа турнира хутшăнчĕç пулсан, малашне ытти аслă шкулсенче вĕренекенсене те явăçтарасшăн кунта. Аслисене ылмаштарма пултаракансем кирлех-çке. Хĕрсем те хăйсен командине тăратма кăмăл пуррине палăртрĕç. Турнирта сăнаса лартăм та, «Кубня», «Кĕтне», «Нĕркеç» командисенчи спортсменсем хушшинче çамрăксем сахалрах. Каплах тăсăлсан малашне район чысне республика шайĕнче кам хÿтĕлĕ;

Пĕрле пухăннипе усă курса çав кун «Кĕтне» ентешлĕх президиумĕн ларăвне те ирттерчĕç. Кăçалхи мартăн 27-мĕшĕнче Шупашкар хулинче ентешлĕхĕн черетлĕ уявне йĕркелеме йышăну кăларчĕç. Ăна Аслă Çĕнтерÿ пулнăранпа 65 çул çитнине халаллĕç.