Публикации » Тар юхтарни çуркунне савăнтарчĕ кĕркунне

Агропромышленноç комплексне аталантарасси — Чăваш Еншĕн тĕп тĕллевсенчен пĕри. Республикăри ялсенче пурăнма тата ĕçлеме лайăх условисем тăваççĕ. Ĕçе пĕлсе йĕркелени, рессурсемпе тухăçлă усă курни, пысăк квалификациллĕ кадрсене яла хăварни ял хуçалăх вăй-хăватне упрама май парать.

«Урожай» колхозăн выльăх-чĕрлĕх пăхаканĕсем, ăна ĕрчетекенсем, çĕр ĕçченĕсем ырми-канми тăрăшаççĕ, вăй çитмесси пирки пĕрре те иккĕленмеççĕ. Хуçалăха 25 çул ĕнтĕ Алексей Никифорович Ершов ертсе пырать. Пултаруллă та маттур ертÿçĕне республикăра кăна мар, Раççей шайĕнче те лайăх пĕлеççĕ.

Çак колхозра — шурутсем, шурутнурăссем тата тутар шурутсем вăй хураççĕ. Чăвашĕ те, тутарĕ те — пурте пĕр çемьери пек пĕрне-пĕри ăнланса тăрăшаççĕ. Çавăнпа ĕçĕ те кал-кал пырать вĕсен.

Хуçалăхра виçĕ бригада вăй хурать. Вĕсене ĕçчен бригадирсем – С.В.Улжусева, Р.Н.Макова тата Г.Х.Галиуллова ертсе пыраççĕ. Кăçал та хастар ĕçченсем лайăх кăтартусем тунă. Çитĕнĕвĕсем те, ÿсĕмĕсем те курăмлă. Трактористсем, комбайнерсем палăртнă ĕçсене вăхăтра, пахалăхлă пурнăçланă. Уйрăмах В.В.Мунтайкин, В.Ф.Тарасов комбайнерсем, Н.Н.Никифоров, А.П.Тарасов, Н.И.Терентьев трактористсем, водительсем те ĕçре тăрăшуллă.

Кăçал хуçалăх ĕçченĕсем тĕш тырă тата пăрçа йышши культурăсене 3191 тонна пухнă, вăтамран кашни гектартан 30,1 центнер туса илнĕ. Çĕр улми туса илес енĕпе те шурутсем малтисен йышĕнче, ăна 120 гектар çинче çитĕнтерсе 3480 тонна туса илнĕ.Тухăçĕ те аван тесе калас килет, кашни гектартан — 290 центнер. Пысăк тухăç, паллах, çĕре вăхăтра апатлантарнинчен, çумкурăкран тасатнинчен чылай килет. Ертÿçĕ тĕл пулура уйрăмах хĕрарăмсене мухтать. «Вĕсем çинче пирĕн колхоз тытăнса тăрать»,— тет вăл ăшшăн йăл кулса.

Паянхи кун «Урожай» колхозăн фермисенче 670 пуç мăйракаллă шултра выльăх, çав шутра 216 пуç ĕне. Халĕ хуçалăхра 1270 пуç сысна, 75 пуç лаша тытаççĕ. Л.П.Пыркина, Т.В.Еремеева дояркăсем, Э.Ш.Галиуллов, И.А.Шарафутдинов, Г.П.Никифорова, А.И.Мунтайкина пăру пăхакансем те ĕçчен

Нумай çул ÿсекен курăксене вăхăтра тирпейленĕ, выльăх-чĕрлĕх валли утă, сенаж çителĕклĕ хывса хăварнă.

Выльăх-чĕрлĕхе пăхас тата ÿстерес енĕпе те шурутсем япăх мар ĕçлеççĕ. Вĕсен шутне çулсерен ÿстереççĕ, продукци илесси те чылай пысăк.

Колхоз председателĕ А.Н. Ершов хăйĕн сăмахĕнче специалистсен, колхозниксен ĕçне пĕтĕмлетрĕ: «Малалла талпăнатпăр. Кашни сехетпе, кунпа усă курма тăрăшатпăр. Çитĕнÿсем те пур. Кăçал çĕр улмин тухăçĕ савăнтарчĕ. Трактористсем, комбайнерсем лайăх ĕçленĕ. Минераллă удобренисене, сĕрмелли-çунтармалли материалсене, кирлĕ запчаçсене вăхăтра туянса машинăсемпе тракторсене яланах юсавлă тытнă, тытаççĕ те». Çапла, пĕр-пĕрне пулăшса ĕçлеççĕ «Урожай» колхоз ĕçченĕсем.

Хуçалăхри машинăпа трактор паркне çĕнетсех пыраççĕ. Акă, кăçал кăна çĕнĕ йышши тырă пуçтармалли комбайн «Полесье» КЗC-1218-29 туяннă. Унпа Владимир Федорович Тарасов 9790 центнер тырă выр- нă.

Хуçалăхăн кăтартăвĕсем район шайĕнче чи лайăххисем. Апла пулсассăн колхоз шав малалла аталанать, ытларах продукци туса илес тесе ĕçлет. Хатĕр продукцие хаклăрах хакпа сутма тăрăшать. Паянхи кун хуçалăх ура çинче çирĕп тăрать. Малашне те çаплах пултăрччĕ, ăнăçу сунатпăр вĕсене.