12 августа 2009 г.
Районти чылай хуçалăхри пекех, «Урожай» колхозра та ĕç вĕресе тăрать. Пĕр уйĕнче комбайнсем тырă выраççĕ, пуçтарса илнĕ лаптăксене улăмран тасатаççĕ. Тракторсем суха касси тăваççĕ. Çав вăхăтрах выльăх апачĕ хатĕрлесси те чарăнса лармасть. Уйри курăк çитĕнет, ăна вăхăтра çулмалла, утă, сенаж хатĕрлемелле.
Йĕтем çине çĕнĕ тырă кĕрет. Ĕç вăхăчĕ кунта ир-ирех пуçланать те сĕм çĕрлечченех тăсăлать. Ара, тырпула вăхăтра пуçтарса кĕртмелле, пÿлмесене хывмалла. Ĕç калăпăшĕ пысăк. Элита урпа çитĕнтернĕ уйран çеç гектартан 52, 7 центнер тĕштырă пуçтарса кĕртрĕç. Пăрçа та япăх мар тухăç пачĕ. Вăл кашни гектар пуçне 26 центнер тухрĕ. Çакă хуçалăх ĕçче-нĕсем тăрăшуллă пулнине туллин çирĕплетет.
Колхоз ертÿçи А.Н.Ершов пур ĕçе те пĕлсе йĕркелесе тăрать. Уй-хирти, фермăри ĕçсене, машинăпа техника паркĕнчи лару-тăрăва та курса тăрать, унта тăрăшакансене хавхалантарса пырать. В.Ф.Денисовăн вара юр кайса пĕтнĕ-пĕтменех пĕр канăç та çук. Кашни хире кун каçа миçе хут çитмест-ши агроном? Çав вăхăтрах ытти çĕре те ĕлкĕрет.
Источник: "Каçал Ен"