Публикации » ÇИРĔП ХУÇАЛĂХРА ŸСĔМСЕМ ТЕ КУРĂМЛĂ

Февраль уйăхĕнче районти пур хуçалăхра та отчетпа суйлав пухăвĕсем иртеççĕ. Хуçалăхсем иртнĕ çул мĕнлерех кăтартусемпе ĕçленине пĕтĕмлетеççĕ. Чи ăнăçлă та тухăçлă ĕçлесе пыракан «Урожай» колхозра та иртнĕ эрнере пуху пулчĕ. Ял çыннисем, хуçалăхра ĕçлекенсем, тивĕçлĕ канăва кайнисем те йышлăн пухăннă. Ĕçлекенсемшĕн пĕлтĕр еплерех кăтартусемпе тăрăшни чăннипех те кăсăклă иккен.

Тухса калаçакансем чылайăн пулчĕç. Чи малтанах тĕп агроном В.Ф.Денисов сăмах илчĕ. Вăл уй-хирте пурнăçланă тĕп ĕçсемпе тĕплĕн те ăнланмалла паллаштарчĕ. «Пĕлтĕр хуçалăхра вăй хуракансем япăх мар ĕçленĕ. Çитĕнĕвĕсем те, ÿсĕмĕсем те курăмлă. Трактористсем, комбайнерсем палăртнă ĕçсене вăхăтра, пахалăхлă пурнăçланă. Г.Н.Долгов, А.А.Трескин, Н.Н.Никифоров трактористсем, И.М.Юсупов водитель ĕçре тăрăшуллă. Тĕслĕхрен, 888 гектар çинче тĕш тырă çитĕнтернĕ. Вăтамран кашни гектартан 33,3 центнер пухса кĕртнĕ. Çĕр улми туса илес енĕпе те эпир малтисен йышĕнче. Пĕлтĕр ăна 120 гектар çинче çитĕнтернĕ. Тухăçĕ те аван тесе калас килет, кашни гектартан 343 центнер илнĕ. Паха тухăç çĕре вăхăтра апатлантарнинчен, çумкурăкран тасатнинчен чылай килет. Ĕçченсем те тăрăшулăхпа палăрчĕç. Хĕрарăмсем кун сиктермесĕрех ĕçе тухнă. Шалу та аван пулнă.

Нумай çул ÿсекен курăксене вăхăтра тирпейленĕ, выльăх-чĕрлĕх валли утă, сенаж çителĕклĕ хывса хăварнă. Малашне те çаплах тăрăшса вăй хурасчĕ»,— терĕ вăл.

Машинăпа трактор паркĕн бухгалтерĕ Р.А.Алимов, тĕп бухгалтер Р.Г.Тукаев, В.М.Аюкова ветврач, В.Н.Казаков инженер-энергетик, ревизи комиссийĕн председателĕ Н.М.Гаврилов тухса калаçрĕç. Кашниех хăйĕн ĕçĕпе, кăтартусемпе паллаштарчĕ, ыйтусем çине хуравларĕ. Р.Тукаев бухгалтер цифрăсем çинче чарăнса тăчĕ. Пĕлтĕр хуçалăх пĕтĕмĕшле 46514 пин тенкĕлĕх тупăш илнĕ. 2007 çулхи кăтартуран (33406 пин) чылай пысăк. Апла пулсан кăçал вĕсем татах та тухăçлăрах, пахалăхлăрах ĕçленĕ. Кăна чăннипех те палăртма кăмăллă. Уйăхри вăтам ĕç укçи 6990 тенкĕпе танлашнă.

Выльăх-чĕрлĕх енĕпе те шурутсем япăх мар ĕçлеççĕ. Вĕсен шутне çулсерен ÿстереççĕ, продукци илесси те чылай пысăк. Акă, сăмахран, хуçалăхра пурĕ 215 пуç ĕне, 704 пуç мăйракаллă шултра выльăх, 1342 пуç сысна, 90 пуç лаша тытаççĕ. Кашни ĕнерен вăтамран 4526 килограмм сĕт суса илнĕ. Пĕлтĕр «Урожай» колхоз пурĕ 16807 центнер сĕт сутнă.

Колхоз председателĕ А.Н.Ершов хăйĕн сăмахĕнче специа-листсен, колхозниксен ĕçне пĕтĕмлетрĕ. «Малалла талпăнатпăр. Кашни сехетпе, кунпа усă курма тăрăшатпăр. Çитĕнÿсем те пур. Пĕлтĕр çĕр улмин тухăçĕ савăнтарчĕ. Трактористсем, комбайнерсем лайăх ĕçлерĕç. Çуракине хатĕрленетпĕр. Эпир минераллă удобренисене, сĕрмелли-çунтармалли материалсене, кирлĕ запчаçсене туяннă. Машинăсемпе тракторсене юсанă. Вăрлăх çителĕклĕ хатĕрленĕ. Пĕлтĕрхи пекех, ĕçченсем те тăрăшуллă пуласса шанас килет. Çапла пĕр-пĕрне пулăшса ĕçлесчĕ. Унсăрăн малалла кайма майĕ те çук», — терĕ председатель.

Хуçалăхри машинăпа трактор паркне çĕнетме те палăртаççĕ. Çĕнĕ йышши комбайн туянасшăн, тракторсем кирлĕ.

Район пуçлăхĕ Г.Ф.Волков та хуçалăх ĕç-хĕлне хак пачĕ. «Урожай» колхоз чăннипех те маттур ĕçленине цифрăсемпе çирĕплетрĕ. Вĕсен кăтартăвĕсем район шайĕнче чи лайăххисем. Апла пулсассăн хуçалăх шав малалла аталанать, çĕннине алла илет, ытларах продукци туса илес тесе ĕçлет. Хатĕр продукцие хаклăрах хакпа сутма тăрăшать. Унсăрăн тупăшĕ те пулмĕ, кассăна укçи-тенки те сахалрах кĕрĕ. Паянхи кун хуçалăх ура çинче çирĕп тăрать. Палăртнине вăхăтра пурнăçлать. Малашне те çаплах пултăрччĕ, ăнăçу сунатпăр вĕсене.