10 октября 2015 г.
"Труд" ял хуçалăх производство кооперативĕнчи ĕçченсем тăрăшуллă пулнине кăтартусем çирĕплетеççĕ. Вĕсем палăртнă ĕçсене вăхăтра пурнăçлаççĕ, уй-хир культурисене, çĕрулмие пысăк тухăçпа пуçтарса кĕртеççĕ. Выльăх-чĕрлĕхрен те аван тупăш илеççĕ.
Паянхи куна "Труд" ЯХПК сĕт-çу ферминче 160 пуç ĕне. Вĕсене виçĕ доярка сăвать: Галина Герасимова, Лидия Шикарева, Суембике Мухутдинова. Хĕрарăмсем пĕр-пĕрне яланах пулăшса, килĕштерсе ĕçлеççĕ.
Акă, Суембике Фазельяновна- маттур та тăрăшуллисенчен пĕри. Вăл 2005 çултанпах хуçалăхра вăй хурать. Суембике доярка ĕçне кỹлĕннĕренпе сăвăм та аванах ỹснĕ. Тĕслĕхрен, вăл пĕлтĕр кашни ĕнерен 5400 килограмм сĕт сунă. Çавна май районти 5 пин кг сăвакан дояркăсен клубне кĕме пултарнă. Кăçал вăл тата ытларах сĕт суса илес тĕллевпе ĕçе утать. Кашни кунах ирлĕн-каçлăн ферма çулне такăрлатать. Ял хуçалăх ĕçченĕ ĕçе вăхăтра тата пахалăхлă пурнăçлать, выльăхсене юратса пăхать. 55 ĕнене сăвасси те уншăн йывăр мар, хăнăхнă ĕç çеç.
А.АНТОНОВА
Источник: "Каçал Ен"