30 апреля 2014 г.
"Чĕлхе пĕтмесен халăх пĕтмест", - тенĕ халăхра. Аннен сăпка юрринче янăранă тăван çемĕ, эпир каланă пĕрремĕш сăмахсем тата çак тĕнче мĕнле пулнине палăртма пулăшнă сăмахсем чăваш халăхне пĕрлештереççĕ. Малашне те чăваш халăхне чăн чăвашлăх туйăмĕ çыхăнтарасса, çывăхлатасса шанатпăр. Çапла пултăр тесе аслисен ачасене мĕн пĕчĕкрен чĕлхене юратма вĕрентсе ỹстермелле. Ача садĕнче чăваш чĕлхи кунĕ ячĕпе эрнелĕх ирттерни те пысăк витĕм кỹрет.
Эрнелĕхре шăпăрлансем чăваш халăхĕн культурипе, юмах-халапĕпе, юрри-кĕввипе, тумтирĕпе паллашаççĕ. Хăйсем те конкурссене, мероприятисене, калаçу сехечĕсене хаваспах хутшăнаççĕ. Юрлаççĕ, ташлаççĕ, выляççĕ, калаçаççĕ.
Акă, аслă ушкăна çỹрекенсем эрнелĕхре савăнăçлă мероприятие хутшăнчĕç. Вĕсем чăваш тумĕсем тăхăнса юрларĕç, ташларĕç, чăвашсен ача-пăча вăййисене вылярĕç. В.Сенатова воспитательпе кĕçĕн ушкăнри ачасем те хутшăнчĕç уява, сăвăсем каларĕç. Çакăн пек уявсем йĕркелени ачасен тавра курăмне, чĕлхе пуянлăхне ỹстерет. Атте-анне чĕлхи çепĕç те ырă пулнине мĕн пĕчĕкрен вĕрентмелле. Килте тăван чĕлхепе калаçни те пысăк витĕм кỹрет. Юратăр, хисеплĕр тăван чĕлхене!
Источник: "Каçал Ен"