04 декабря 2013 г.
2014 çулхи февраль уйăхĕнче Комсомольски районне туса хунăранпа 75 çул çитет. Çав сумлă юбилей ячĕпе ноябрĕн 29-мĕшĕнче культура марафонĕ пуçланчĕ те ĕнтĕ. Художество пултарулăх коллективĕсен смотр-конкурсне пуçлаканĕ Чĕчкен ял поселенийĕ пулчĕ. Смотр-конкурса уçса район администрацийĕн пуçлăхĕ Михаил Афанасьев пурне те çитес юбилей ячĕпе тата Комсомольски районĕ 2014 çулта Республика кунне ирттерме тивĕç пулнипе саламларĕ, вырăнти артистсене ăнăçу сунчĕ.
Ял поселенийĕн пуçлăхĕ Юрий Лукиянов Чĕчкен ял тăрăхĕн пурнăçĕ, ĕçĕ-хĕлĕ çинчен тĕплĕн каласа пачĕ. Ку поселенире икĕ ял — Аслă Чурачăкпа Чĕчкен, икĕ халăх çыннисем — чăвашсемпе тутарсем — килĕштерсе пурăнаççĕ. Ял ĕçченĕсем «Труд» ял хуçалăх производство кооперативĕнче вăй хураççĕ. Ачасем вырăнти тĕп тата вăтам шкулсенче ăс пухаççĕ, ял çыннисем пĕтĕмĕшле практика врачĕн офисĕнче медицина пулăшăвĕ илеççĕ, уявсемпе пушă вăхăтне информаципе культура центрĕнче ирттереççĕ, тĕне ĕненекенсем валли чиркÿ, мечет пур. Кунта çынсен пурнăç шайне çĕклессишĕн тăрăшса инфраструктурăна пĕрмаях аталантараççĕ, тирпей-илем ыйтăвне чи малти вырăна хураççĕ.
Концерт программинче икĕ халăхăн туслăхĕ яр-уççăн курăнчĕ. Чăваш, тутар тата вырăс юрри-ташши пĕр-пĕринпе улшăнса тăчĕç. Сцена çине ача-пăча та, тĕрлĕ ĕçре тăрăшакансем те, тивĕçлĕ канурисем те тухрĕç. Ку тăрăхра пурăнакансем юрă-ташăра чăннипех маттуррине çирĕплетсе пачĕç. Татьяна Макарова, Дмитрий Лукиянов, Еленăпа Сергей Просвирновсем, амăшĕпе хĕрĕ Альмира тата Зульфия Идиатуллинасем уйрăм юрăçсем те илемлĕ сассисемпе куракансене савăнтарчĕç. Аслисен «Илем», ачасен «Тевет», «Дуслык» ансамблĕсен сцена костюмĕсем те питĕ илемлĕ, вĕсене вырăнти çĕвĕ цехĕнчех çĕлетнĕ иккен.
Смотр-конкурс пуçланчĕ, смотр-конкурс малалла тăсăлать. Декабрĕн 6-мĕшĕнче Асанкассисем хăйсен пултарулăхĕпе паллаштарĕç. Çавна май хăш-пĕр сĕнÿ те вырăнлă пулĕ тетĕп. Кирек хăçан та художество пултарулăх коллективĕнче хорсем тĕп вырăн йышăннă. Малашне вĕсен хăватлă та мăнаçлă сассисене те илтесчĕ. Куракана концертран концерта куçакан юрă-ташă йăлăхтарнине кура çĕнĕ репертуар суйласан аванччĕ. Унта тăван ене, района, тăрăха мухтаса çырнă хайлавсене кĕртни район юбилейĕпе çыхăнса тăрĕ. «Чĕрĕ» сасса итлеме фонограммăран чылай кăмăллăраххине те шута илесчĕ вырăнти талантсен. Смотр-конкурса хаклама туса хунă жюри комиссийĕ те çак енсем çине пăхнине асра тытасчĕ.
Л.ШУРЯШКИНА.
Источник: "Каçал Ен"