Публикации » Опытлă наставник

Вунă çул ытла Сергей Наумов «Труд» ял хуçалăх производство кооперативĕнче водительте ĕçлет. Унччен маларах çак хуçалăхрах, 1984 çултанпа, рабочире тăрăшнă. Сергей Аркадьевичăн опычĕ те пысăк, ахальтен мар ĕнтĕ ăна çамрăксен наставникне тăтăшах çирĕплетеççĕ.

— Пирĕн коллектив туслă, пĕр-пĕринпе канашласси, сăмахпа, ĕçпе пулăшасси йăлана кĕнĕ,— тет водитель.

Тăрăшуллă водитель техникăна тирпейлĕ тытать. «Сергей Аркадьевич вăр-вар ĕçлесе пур çĕре те çитме васкать. Çулла утă-улăм хывнă, кĕркунне вара тымар çимĕç пухнă çĕрте тăрăшать»,— терĕ ĕçне чунтан парăннă водитель пирки Геннадий Кузьмин агроном. С.Наумовăн мăшăрĕ Елена Вениаминовна та кооперативра тăрăшать. Вăл — ферма заведующийĕ.

Наумовсем иккĕшĕ те — ĕçрен хăраман çынсем. Çавăнпа та вĕсем коллективра, ял-йышра пысăк хисепре.