Публикации » Уй-хирте ĕç вĕрет

«Çу кунĕ хĕлĕпе тăрантарать», — теççĕ халăхра. Çакна тĕпе хурса «Труд» ял хуçалăх производство кооперативĕн ĕçченĕсем ырă çанталăкри кашни самантпа туллин усă курма тăрăшаççĕ. Хальхи вăхăтра кунта вырма ĕçĕсем хĕрÿ пыраççĕ. «30 гектар çинчи пăрçана çулса-çапса пĕтернĕ ĕнтĕ. Тухăç кашни гектартан 22,9 центнерпа танлашрĕ. Ку кăтартăва япăх мар теме пулать», — паллаштарать лару-тăрупа ял хуçалăх кооперативĕн тĕп агрономĕ Геннадий Кузьмин. Кĕрхи туллăн тухăçĕ чылай начартарах пулнишĕн пăшăрханнине пытармасть вăл. Çакă кĕрхисем япăх хĕл каçнипе, çуркунне вырăн-вырăн çĕнĕрен акма тивнипе çыхăннă. Туллăн япăхрах пайне сенажа янă.

Халĕ вара сĕлĕ анинче ĕç вĕресе тăрать. Кунта комбайнсен шавĕ пĕр самантлăха та лăпланмасть. Дмитрий Шуряшкин тата Александр Шуряшкин комбайнерсем пикенсех сĕлĕ выраççĕ. 97 гектар çинчи сĕлле çак кунсенчех вырса пĕтерме, унтан тÿрех çапма тухма палăртнă. «Çапнă çĕре тепĕр комбайн та хутшăнĕ. Унпа Минравиль Алимов ĕçлет», — пĕлтерет Г.Кузьмин. Çак лаптăкри ĕçсене пĕтерсен «хир карапĕсем» тулă ани çине куçĕç. Ĕç нумаййине кура вĕсем иртен пуçласа каçченех уйра тăрăшаççĕ. «Çанталăк лайăх тăнипе усă курса юлмалла. Кайран кая юлсан каю шăтать тенĕ пек пулса тухма пултарать», — теççĕ комбайнерсем.

Çавăн пекех козлятник пулнă лаптăка та çитсе куртăмăр. Унта халĕ Минегим Зейнетдинов çĕнĕ тракторпа çĕре сухалама пикеннĕ. Кунта кĕрхи тырăсем акма планлаççĕ, çакна валли çĕр хатĕрлеççĕ.

Пĕтĕмĕшле илсен, хуçалăхра ĕçсем кал-кал пынине, кооператив ĕçченĕсем алă усса ларманнине палăртмалла. Эппин, тухăç лайăх пуласса, пÿлмесем тыр-пулпа туласса шанма пулать.