Публикации » Тавра курăма ÿстерме майсем çителĕклĕ

Аслă Чурачăкри социаллă культура центрĕнчи модельлĕ ял библиотекинчен çын татăлмасть. «Çу кунĕсенче, паллах, вулакансен йышĕ чакать. Хĕлле вара библиотекăна килекенсем йышлă. Вĕсен шутне тĕп-тĕрĕс палăртма та çук пулĕ. Пĕрисем кĕнеке вулама илеççĕ, теприсем хаçат-журналпа паллашма кĕрсе тухаççĕ. Ачасене, паллах, телевизорпа мультфильмсем, вĕрентÿпе çыхăннă картинăсем пăхма килĕшет»,— паллаштарать библиотека ĕçĕ-хĕлĕпе Е.Г. Просвирнова заведующи. Библиотека фондĕнче 10 пин ытла кĕнеке. Чăвашла, вырăсла, тутарла тата ют çĕр-шыв чĕлхипе çырнисем те пур. Кунсăр пуçне электронлă дисксене те киле парса яраççĕ.

12 тĕрлĕ хаçат-журнал çырăнса илеççĕ. Вĕсем, тĕпрен илсен, ачасене, ял-йыша кирлĕ изданисем. «Хушма хуçалăх», «Сывлăх», «ЗОЖ», «Тантăш» хаçатсене юратса вуланине палăртать библиотекарь. Район хаçатне «Каçал ене», «Хыпара» та кашни килекенех алла илет. Елена Геннадьевна ачасенчен Наташа Григорьева, Саша Ипатова, Ландыш Мухутдинова, Катя Наумова вĕренекенсем библиотекăна тăтăшах çÿренине палăртрĕ. Аслисенчен Керимулла Мухаметшин, Николай Никифоров, Минфагил Гимаев, Галина Шикарева, Денис Волков, Владимир Пушкин кĕнекепе туслă.

Библиотекăра тăтăшах тĕрлĕ мероприятисем йĕркелеççĕ. Кăçал В.Шемекеевăн «Ай, тăварлă-çке кĕвĕçÿ куççулĕ» кĕнеки тăрăх вулав конференцийĕ ирттернĕ. Унта вулакансем йышлăн хутшăннă, пурнăçри çивĕч ыйтусене хускатнă произведение тĕплĕн сÿтсе явнă. «Пур конкурссене, вăйăсене тата ытти мероприятисене асăнса та пĕтереймĕн. Кĕнеке выставкисем тăтăшах йĕркелетпĕр»,— тет Е.Просвирнова. Чăн та, библиотекăн кашни кĕтесĕнчех пĕр-пĕр тематикăпа çыхăннă кĕнекесен пайăррăн уйăрнă выставкисене вырнаçтарнă. Килти хуçалăх, сывлăх, тăван ен историйĕ, çĕр-шыври паллă çынсем... Ачасем валли те кĕтес пур. Кăçал Космонавтика çулталăкĕ пулнипе ятарлă стенд хатĕрленĕ.

Пĕр сăмахпа каласан, ял çыннисене культурăллă канма, тавра курăма аталантарма условисем те пур.