Публикации » Тыр-пул лайăх çитĕнессе шанаççĕ

Ирхине ăна нихăçан та ĕç пÿлĕмĕнче тытайманнине туйса хире васкатăп. Чăнах та, Василий Николаевпа кооператив агрономĕ Геннадий Кузьмин 6-мĕш хиртеччĕ. Кунта Дмитрий Скворцовпа Дмитрий Шуряшкин культиваци тăваççĕ. Сăмах май, Дмитрий Скворцов районти трактористсен конкурсĕнче тăтăш малти вырăна тухать. Василий Петрович пĕлтернĕ тăрăх - хуçалăхра механизаторсем çителĕклĕ. Вĕсен йышĕнче çамрăк та чылай. Ертÿçĕ Алмаз Миназетдиновпа кăмăллă пулнине палăртрĕ. Алмаз ирхине фермăра вăй хурать, выльăх апачĕ валеçет. Халĕ Ранис Камалитдиновпа тулă акать.

Аслă Чурачăксемпе Чĕчкенсем çур акине Комсомольски районĕнчи ытти хуçалăхпа пĕр вăхăталлах тухнă. Çурхи ĕçсене тĕплĕн хатĕрленнĕ. Çунтармалли-сĕрмелли материал, вăрлăх çителĕклĕ хатĕрленĕ, вĕсене 100 проценчĕпех им-çамланă. Малтанах нумай çул ÿсекен курăксене апатлантарнă.

Паянхи кун тĕлне 500 гектара яхăн урпа, тулă, пĕр çул ÿсекен курăк акнă. Пĕрчĕллĕ тата пăрçа йышши культурăсем 688 гектар йышăнĕç.

«Çур акине ытти çулти пек кĕске вăхăтрах вĕçлесшĕнччĕ. Шел, çуркунне каярах килчĕ. Çĕр пĕр вăхăтра пиçмерĕ, йĕпе вырăн чылай. Вĕсене хăварса урăх лаптăка куçатпăр. Каярах малтанхи вырăна таврăнатпăр. Çапла акмалли вăхăт тăсăлать. Çу уйăхĕн малтанхи кунĕсенче çумăр çурĕ. Çĕр йĕпе пулнăран çĕр улмипе выльăх кăшманĕ лартаймастпăр», - тет Василий Петрович.

Çĕр ĕçченĕсем ирĕн-каçăн хирте. Хальлĕхе пĕр сменăпа вăй хунипех ĕлкĕреççĕ. Поварсем вĕри апата хирех илсе тухаççĕ.

«Труд» 60 гектар ытла çĕр улми лартма палăртнă. Çак ĕçе кĕске вăхăтра вĕçлесшĕн. Василий Николаев кăçал тыр-пул та, пахча çимĕç те ăнăçлă пуласса шанать. Ахальтен-им унăн юратнă каларăшĕ: «Лайăххи пултăр».