05 сентября 2015 г.
Çемье - обществăн тĕп пайĕ, унта çынсем хушшинчи кăмăл-сипет, ăс-хакăл, эстетика, хуçалăх хутшăнăвĕсен пĕтĕм енĕ туллин палăрать.
"Çемье халалĕсем чăваш хушшинче яланах çирĕп пулнă. Çав тупрана лайăх сыхласа упрăр. Çемье телейĕ - пурнăçри йывăрлăхсенчен сыхлакан шанчăклă хỹтĕлев", - тесе ăс панă чăвашсене çутта кăлараканĕ И.Я.Яковлев.
Чăваш Республикинче çемье институтне тĕреклетме пулăшакан ĕç çирĕппĕн пурнăçланса пырать. Ачаллă çемьесене патшалăх пулăшăвĕ парасси вăйланать. Нумай ачаллисене хуçалăх тытма е пурăнмалли çурт-йĕр лартма çĕр лаптăкĕсене тỹлевсĕр уйăрса параççĕ.
Комсомольски районĕнче те нумай ачаллă çемьесене çĕр лаптăкĕпе тивĕçтерессипе анлăн ĕçлеççĕ.
Акă, сентябрĕн 1-мĕшĕнче Урмаел ялĕнче пурăнакан нумай ачаллă 43 çемье çĕр лаптăкне тỹлевсĕр илме май паракан сертификатлă пулнă. Вĕсене район администрацийĕн пуçлăхĕ Алексей Самаркин ăшшăн саламланă.
Нумай ачаллă çемьесене пырса тивекен ыйтусене район администрацийĕн экономика, çĕр тата пурлăх хутшăнăвĕсен пайĕн пуçлăхĕ Светлана Ульдина уçăмлатнă.
Паянхи куна район администрацийĕ нумай ачаллă 193 çемьене шута илнĕ. Вĕсенчен 78-шĕ - çурт-йĕр хăпартма, 114-шĕ - килти хушма хуçалăха тытса пыма, 1 çемье дача тума çĕр ыйтнă. Асăннă тĕллевсене шута илсе 33,8 гектар çинче 169 çĕр лаптăкĕ хатĕрленĕ. 154 çемье пурĕ 27,6 гектар йышăнса тăракан çĕр лаптăкĕллĕ пулнă.
Нумай ачаллă çемьесене çĕр лаптăкĕпе тивĕçтерес ĕç малалла пырать.
Источник: "Каçал Ен"