05 августа 2015 г.
Тăван çĕршыва сыхласси - кашни арçын тивĕçĕ. Хăш-пĕрисем хĕсметре тăрассинчен пăрăнса çỹреççĕ пулсан та, чылай каччă хăйсен тĕп тивĕçне пурнăçлама тăрăшать. 1 çул хĕсметре тăнисĕр пуçне каччăсем çар вĕренỹ учрежденийĕсене вĕренме каяççĕ.
Акă кăçал та Раççей Федерацийĕн Оборона министерствин тĕрлĕ çар академийĕсенче, вĕренỹ учрежденийĕсенче пĕлỹ илме кăмăл тунă каччăсем самаях пулчĕç. Урмаел вăтам шкулĕн выпускникĕ те Ирек Адиев Воронеж хулинчи Сывлăш-Çар вăйĕсен аслă çар академине вĕренме кĕнĕ.
Ирекĕн мĕн пĕчĕкренех офицер пулас ĕмĕт пулнă. Вăл 7-11-мĕш классенче "Зарница" тата "Орленок" çарпа спорт вăййисенче командир пулса темиçе хутчен те "Чи лайăх командир" ята тивĕçнĕ. Урмаел вăтам шкулĕн команди те пĕрре çеç мар малти вырăнсене йышăннă. Ирек районти тата республикăри ăмăртусемпе олимпиадăсенчен грамотăсăр таврăнса курман та пулĕ. Унсăр пуçне пултаруллă каччă нумай хутчен мини-футбол чемпионĕ пулнă.
Пулас офицера академине кĕме çар комиссариачĕн Елчĕк тата Комсомольски районĕсенчи пайĕнче ĕçлекен Ирина Викторовна Козлова, ОБЖ тата физкультура предмечĕсене вĕрентекен Нежеметдин Садртдинович Сахров питĕ пысăк пулăшу кỹнĕ.
Эпир вара Ирека Раççей Федерацийĕн хĕç-пăшаллă вăйсен çарĕн чăн-чăн офицерĕ пулма, çĕршыв хỹтĕлевçин тивĕçне тỹрĕ кăмăлпа пурнăçлама сунатпăр.
Н.БЕЛКОВА
Источник: "Каçал Ен"